Asbest: Meeqqat ilinniartitsisullu napparsimalersinnaapput
Ilulissani Atuarfik Mathias Storchi, AMS, ukiup tullianiit kittaarlugu iluarsartuunneqassappat, meeqqat 630-it inersimasullu 70-it puaat ukiuni arlalinni ullut tamaasa asbestimik immerneqartarnissaat atuarfiup siulersuisuinit ernummatigineqarpoq.
Taamaattumik AMS-imi siulersuisut kommunemi Namminersornerullutillu Oqartussani akisussaasut kaammattorpaat, atuarfik ukiuni arlalinni kittaarlugu iluarsartuunnagu, nutaamik atuarfilioqqullugit.
Atuarfiup siulersuisui naapertorlugit atuarfiup qilaavini iigaanilu asbesteqarpoq.
Atuartut iikkanik innarliijuartarput, taamaattumik atuarfimmi aqutsisut siulersuisullu pilersaarutigaat atuartunut angajoqqaanullu annerusumik paasissutissiiniarlutik, atuarfiup iigaanik sequtserisoqartannginnissaa anguniarlugu.
Atuarfik tamarmi ajoquteqannginnersoq sapaatip akunnikkaartumik ullumikkut misissorneqartarpoq.
Asbest passunneqanngikkuni avatangiisinut ajoqutaanngilaq.
Atuarfiup iluarsartuunneqarnissaa Ineqarnermut Attaveqarnermullu Pisortaqarfiup akisusaaffigaa, Mathias Storchillu Atuarfiani siulersuisut saaffiginninnerat tunngavigalugu Ilulissat Kommuneata Namminersornerullutik Oqartussat ilisimatippaat, asbesteqarnera ajornartorsiutaalersinnaasoq. Tamatumalu kingorna qanoq pisoqassanersoq Pisortaqarfiup aalajangissavaa.
