Arviat nersornaatit akimanersaannik nersornaaserneqarpoq
Nersornaasiisoq tassaavoq nunarsuarmi angallanneq takornariaqarnerlu pillugit siunnersuisoqatigiit The World Travel and Tourism Council. Arviaq nunarsuarmi takornariarfiusinnaasuni soqutiginarnerpaatut immikkuullarinnerpaatullu nalilerneqarpoq.
Arviarmiut inooriaasertik aallaavigalugu takornarialerisalerniarlutik ukiut marluk matuma siornatigut aalajangerput ataatsimoorlutillu suliniuteqalerlutik.
Ileqqutoqqatik atorlugit inooriaasertik takornarianut ullualunnguani takutittarpaat misigitittarlugulu. Masarsummi qeriuaannartumi pisuttuartitsisarput, qimussertitsisarput, tupertitsillutik imaluunniit illuaqqamiisitsillutik aamma imaani angallassisarput. Issittormiut ileqqutoqqatik atorlugit qanoq inooriaaseqarsimanersut aamma takutinneqartarpoq.
Inuit kultooriat takornariartitsinermi aallaaviusarpoq, eqqumiitsuliortunut pulaartoqarsinnaasarpoq kiisalu qiperukkanik, qaatiguunik parkanik pinnersaatinillu inuit suliaannik pisisoqarsinnaasarluni.
Takornariat qilaatersortunik torlorsortunillu isiginnaariarsinnaasarput utoqqarnullu imaluunniit eqqumiitsuliortunut ualinerani aamma pulaartoqarsinnaasarluni - tassani tiitorlutillu qanga inuit angalaannartuugallarmata inooriaasiat pillugu oqaluttuunneqarsinnaasarput. Aamma nerisassaataannik, soorlu tuttumik, aalisakkanik aqissinillu nerillutik misiliisinnaasarput.
Arviarmiut isumassarsiorfigalugit takornariaqarnermi, pingaartumik nunat inuiisa akornanni ineriartortitsisoqarsinnaasoq nersornaasiisut isumaqarput.
