Assi: Suzanne Hamilton/Flickr Creative Commons

ARTEK-ip peqataaffigisaa nersornaasigaasoq

Nunat Europameersut suliniutaat Circular Ocean, ARTEK-ip, Sisimiuniittup, aamma peqataaffigisaa, nersornaammik RegioStars Awardsimik, EU-kommissionimit ukiumoortumik tunniunneqartartumik tunineqarpoq.

Center for Arktisk Teknologi, ARTEK, suliniummi Circular Oceanimi peqataavoq, eqqakkallu imarpinni ajornartorsiutaaleraluttuinnartut pillugit iliuuseqartoqarnissaanut suliniutaalluni.

Aamma atuaruk Plastikkimik mingutsitsineq Issittup imartaanut siaruaattoq

Suliniut Circular Ocean, RegioStars Awardsip iluani Public Choice Awardimik pisagaannik nersornaaserneqarpoq. Atoqqiisoqarnerulernissaa suliniutigineqarpoq, pingaartumik plastikkimik atoqqiisoqarnerulernissaa anguniagaalluni.

Aamma atuaruk Imarpiit plastikkinik igitakunik ulikkaaraluttuinnarput

Nersornaat oktobarip ulluisa aqqarnanni tunniunneqarpoq, Europami nunap immikkoortuisa illoqarfiisalu sapaatip-akunneranni nersornaasiisoqarluni.

Aamma atuaruk Atugarissaarnerup kingunipilui oqalugiaatigilerai

Circular Ocean, Nunani Avannarlerni Issittumilu ilisimatuussutsikkut sulinermi tunngaveqarpoq, ARTEK-imilu Ph.D.-tut ilisimatusartoq Ida Maria Giesztor Bertelsen peqataalluni.

Plastikkip imarsiornermut atatillugu atorneqarsimasup, assersuutigalugu qassutikut pillugit ineriartortitsisoqarnissaa Circular Oceanip siunertaraa. Plastikki qassutini atorneqarsimasoq betonip cementilluunniit qajannaallisarneqarnissaanut atorneqarsinnaavoq.

- Circular Oceanimi suliniutip taama nersornaaserneqarnera ARTEK-imi nuannaarutigaarput. Suliniut aqqutigalugu nutaaliortoqarsinnaanera takutinneqarpoq, Circular Oceanilu aqqutigalugu ilisimatusarneq nunat avannarliit Kalaallit Nunaatalu imartaanni pitsaasumik sunniuteqarsinnaassasut isumaqarpugut, Lisbeth M. Ottosen, DTU Bygimi, ARTEK-illu pisortaata tullia oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl