Arsummi saarullinnik sapaatip akunnera uani pisaqamangaatsiarputAssi: Ejvind Jensen

Arsummi saarulliit ukiumut pisarineqartartut akunnerni marlunni pisarineqartut

Ukiuni kingullerni Kujataani aalisartut ilaasa saarulleqarpiannginnera malugereerlugu, aalisartut Arsummi saarullineqqinnera nuannaarutigaat

- Ukiorpassuit maani saarulleqanngilagut, ukiut 30 missaani iluamik saarulleqanngilaq. Saarullinilaartaraluarpoq ikittunnguilli, Verner Hansen KNR-imut oqarpoq.

Arsummeersoq aalisartoq piniartorlu Verner Hansen 73-inik ukioqarpoq. Inuuninilu naallugu aalisartuulluni.

Taassuma oqarnera naapertorlugu ukiuni kingullerni saarulliit amerlanngillat, maannali saarulliit 1 tons sinnerlugu pisaqarami nuannaarutigaa inuusukkallarnerminilu eqqaamasaminut utersaarpoq.

Arsummi aalisartut pingasut saarullinnik tunisisarput.

2018-imi saarulliit 1 tons Arsuk Food-imut tunineqarsimapput. 

2019-imi 7 tons tunineqarsimallutik.

2020-imi 650 kilo saarulliit tunisassiorfimmut tunineqarsimapput.

2021-imi 17 tons tunineqarsimapput.

Ukioq mannalu maannamut 12,079 kilo tunineqarsimalluni.
 

- Novembari aallartereersoq aalisaleratta umiatsiaaraannarmik aalisarpugut, qassutit ataasiinnaat kivisittarlugit. Kingullermik 2 tiimiinnaq ningisimariarlugit amoorakkit 1.000 kiilu sinnilaarlugu pisaqarsimapput.

Kujataani saarullikissimmanera saarullinnik ilisimatusartup Pinngortitaleriffimmi saarulliip pillugit immikkut ilisimatusartup Anja Retzelip aamma uppernarsarpaa.

Saarulliit kujaani aalisartunit tunineqartut aatsaat taama amerlatigusut taassuma aamma oqaatigaa. 

- Tamanna avataani saarullikinnerulerneranik peqquteqarpoq, kujataanilu sineriammut qanittumi saarullinniartut saarullinnik avataaniit sinerissap qanittuanukartunik aalisartartut saarullikilligaangat eqqugaasaqaat. Maanna saarullinittoq takuarput, tamannalu sinerissap qanittuani saarulleqarnerulerneratigut aamma erserpoq, Anja Retzel oqarpoq.

Ilisimatusartoq: saarulliit ukiakkut takkuttarnerat nalinginnaaneruvoq

Saarulliit amerlinerat ukioq kingullerli malunnarsivoq.

- Ukioq kingulleq 2021-imi takusinnaalereerparput tunisat qaffariarsimareertut, tunisinerpaaffillu oktober novemberillu akornanniilluni. Decemberimi saarullinnik tunisisoqarsimanngilaq. Kujataani ukiakkut saarulliit takkuttarnerat naliginnaaneruvoq, tamanna avataani saarulleqassusermik misissuinitsinni paasivarput. Saarulliit taakku avataaneersuunerusarput kangerlunnullu pulagaangata aalisartunit pisarineqartarput, Anja Retzel KNR-imut oqarpoq.

Saarulliit 2020-mi Arsuk Food-imut tunineqarsimasut 650 kiiluupput. 2021-imilu 17 tonsit saarulliit tunineqarsimallutik.

Ukioq manna novembarip aappaat ilanngullugu 4,6 tonsit tunineqarsimasut, ilisimatusartoq Anja Retzel oqarpoq. Arsuk Foodilu naapertorlugu novembarip aappaanniit 21-anut. 7,479 tons saarulliit tunineqarsimapput.

Ukioq manna katillugu saarulliit 12,079 tonsit Arsummi aalisartunit pingasuusunit tunineqareersimasut Arsuk Food KNR-imut paasissutissiivoq.

Aalisartoq: Arsummi saarullinniarneq imaaliallaannagassaanngilaq

Arsummi saarullinniarneq ajornakusoorsinnaasartoq Verner Hansenip oqaluttuaraa, ilaatigummi sila imarlu unerisimaneq ajorput.

- Massakkut saarullinissimagaluarpugut, kisianni avataatungitsinni 100 meterisut itissusilimmiipput. Massakkut aalisarniarsarigaluarpugut sila unerisimannginnermik.

Silagitsilluguli iluatitsisarput.

- Qassusersorluta aalisartarpugut 1 tiimi 2 tiimi ningisimalaaginnartarlugit pisaqarluartaraluarput, Verner Hansen oqarpoq.

Arsuup eqqaani saarulleqaannassanersoq ilisimatusartup Anja Retzelip nalileruminaatsippaa.

- Siunissaq qanoq isikkoqarsinnaanersoq oqaatigiumipaappoq, misilittakkalli naapertorlugit saarulliit ikileqqissinnaanerat ilimanarsinnaavoq. Assersuutigalugumi ukioq kingulleq decembarimi saarullinnik tunisisoqanngilaq. 

- Saarulliit amerlassusaat ukiumut suffisut allisullu amerlassussaat aallaavigalugu nikerartarpoq, taamaammat sineriammut qanittumi saarulleqassuseq nikerartarluni. Ukiumi ataasiinnarmi pisarnermit amerlanerugunik tammapallannissaat ilimanarneruvoq, Anja Retzel KNR-imut oqarpoq. 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl