Arsummi najugallit sullinneqarnerat ajorseriartussaassaaq
Issittumi Sakkutooqarfiup pilersinniarneqarneranut atatillugu, Kangilinnguani Sakkutooqarfik matuneqartussaavoq, illoqarfimmilu allami qullersaqarfeqalertussaanera pilersaarutaalluni.
Kangilinnguani Sakkutooqarfik matuppat, tamassuma Arsummiunut qanoq sunniuteqartussaanera paaserusullugu, folketingimut ilaasortap, Doris Jakobsenip Siumumeersup, Illersornissamut ministeri Nick Hækkerup apeqquteqaateqarfigaa.
Nick Hækkerupip akissuteqarnermini oqaatigaa, Kangilinnguani Sakkutooqarfiup matuneqarneranut atatillugu Arsummiunut tamassuma sunniutigisinnaasaat suli misissorneqarsimanngitsut.
Illersornissamulli ministerip oqaatigisinnaanerarpaa, qulimiguulimmik timmisartuussinissanut isumaqatigiissut atorunnaarsinneqarsinnaasoq aammalu nakorsamit kigutip nakorsaannillu nunaqarfimmiunut ikiuisarnermik isumaqatigiissut atorunnaarsinneqarsinnaammat, sakkutooqarfiup qaammatinik pingasunik matuneqarnissaa sioqqullugu.
Illersornissamut ministerip akissutai aallavigalugit, Doris Jakobsenip Naalakkersuisut maanna saaffigai, Arsummiunut sullissinerup appariartinneqannginnissaa eqqarsaatigalugu Naalakkersuisut qanoq siunertaqarnersut paaserusullugu.
- Arsummiut nunaqarfitsik siunissami qanoq iliuuseqarfiginiarneqarnersoq maannangaaq nalornivaat, taamaattumik Naalakkersuisut tamassumunnga akissuteqartariaqarput, Doris Jakobsen oqarpoq.
Kangilinnguani Sakkutooqarfik matuneqarpat, taassuma taartissaa, Issittumi Sakkutooqarfik Nuummut nuunneqassaaq, aatsaalli maanna isumaqaigiissutaasoq 2014-imi atorunnaarpat taamaaliortoqarsinnaalluni.
