Arsartartut hasheerniartut B-67-ip akuerisinnaanngilai
Erseqqissassavarput timersoqatigiiffiup hashi ikiaroornartullu allat timersoqatigiiffiup akuerisinnaannginnamigit, suliamullu atatillugu timersoqatigiiffiullu arsartartut pineqartut marluk ingerlaannartumik timersoqatigiiffimmit ilaasortaajunnaarsikkallarpai, unammisartoqatigiinniillu erngertumik aamma qimaguteqquneqarput. Pineqartut hashi pillugu inatsisinik unioqqutitsisimappata, timersoqatigiiffimmit anisitaanissaannik kinguneqassaaq, B-67-ip siulersuisuuneri tusagassiorfinnut nalunaaruteqarlutik taama allapput.
B-67 Isikkamik arsartartuisa meeqqat inuusuttullu pingaartillugit isikkamik arsarnerup ineriartortinneqarnissaa ukiuni arlalinni ilungersorluni sulissutigisimavaa, aamma maannamut angusavut tulluusimaarutigaagut.
Timersoqatigiiffik, sungiusarnikkut pimoorussilluni suliaqarnermi saniatigut, aamma naleqartitanik tunngaviusunik malittarisassaqarpoq, timersoqatigiiffiullu ilaasortaata taakku malittussaavaat, soorlu peqqissumik inooriaaseqarnissaq, imminut allanullu ataqqinninnissaq allalu.
Timersoqatigiiffiup naleqartitami tunngaviusut akerlerluinnaanik pisoqarneranit eqqugaavoq, tamannalu timersoqatigiiffiup tamarmi ajuusaarutigisupilussuuaa.
Qanoq ililluta imigassamik hashimillu atornerluinerup akiorniarneqarnissaanut eqeersimaartumik peqataasinnaanerluta B-67-imi maanna isumaliutigissavarput, ajornartorsiutimmi nunatsinni annertuupilussuunera ersarippoq, siulersuisuunerit isumaqarput.