Arsarnerit suli alutorsaataapput nuna sajussimagaluartoq

Japanimi nunap sajunnerata malitsigisaanillu tassaarsuaqarnerata kingunerinik, japanimiut angalarusussusaat killilerneqassagunavippoq, japanimiorpassuillu ajunaarnersuup kingorna aningaasarsiornikkut ajornartorsiorput.

Ajunaarnersuaq pissutigalugu japanimiut soorlu Danmarkimut takornariartartut 20 procentimik ukioq-manna ikileriassangatinneqarput.

Kalaallit Nunaannulli takornariartartut ikilinissaat Nunatsinni
Takornariaqarnermut Inuussutissarsiornermullu Siunnersuisoqatigiinni sulisup, Anders la Courip ilimaginngilaa.

- Japanimiut Kalaallit Nunaannut takornariartartut amerlanngillat. Takornariartartulli arsarnerit pissutigalugit takkuttarput. Tassa japanimiut ukiakkut ukiukkullu takkunnerusarput, maannalu takusinnaalereerparput "arsarnernik takornariartartut" ukioq-manna aamma takkutissasut. Gruppit marluk/pingasut ukiarumut inniminneereerput, Anders la Cour Radioaviisimut oqarpoq.

Japanimiut arsarnernik nuannarisaqarnerannut pissutaatinniarneqartarpoq Japanimi ussateqarmat ernertaarnissaq ilimanarnerusartoq arsarnerit ataanni naartulersitsineq pisimagaangat...