Arsaattunik isiginnaartut perulluliortut
Arsaattartut peqatigiiffianniit Laziosimeersut tapersersortaasa ilaat Italiamiut politiivisa piaarinaatsoornikkut aallaammassuk peulluliornerit aallartissimapput. Arsaannerinnarlu kisimi pineqanngilaq, Italiamik nalunnginnilluartoq Morten Bejder Berlingske Tidendemut oqarpoq, arsaaffimmi isiginnaartut italiami inuiaqatigiit agguataarneriniit tamaniit aggiasartut.
Arsaattunik isiginnaartut akornanni takuneqarsinnaavoq inuiaqatigiinni susoqarnersoq, ulluinnarni arsaaffiup avataani takussaavallaanngikaluartut arsaattut akornananni takoqqusaartarmata. Arsaattunik isiginnaariartartut ilaasa arsaanneq pinngikkaluarlugu politikkikkulli oqariartuutiginiakkatik takoqqusaartarpaat, soorlu Siciliami isiginnaartut allagartarsuarnik nassartarput ilaatigut allassimasunik; ”Mafia suliffissaqartitsivoq” imaluunniit soorlu inunnik immikkoortitsiniarpalaartunik oqariartuutillit ukiorpassuarni Italiami arsaattunik isiginnaartut akornanni takornartaanngillat. Laziomeersut assersuutigissagaanni fasistiupput peqqarniitsut, Peqatigiiffiullu illuutaa iseraanni qanoq politikkikkut eqqarsartarnersut ingerlaannaq takuneqarsinnaavoq, Moussolinimmi eqqaassutissaa nazistillu ilisarnaataat inimi saqquminersaapput. Talerperliuniat kisimik arsaattartunik aalajangersimasunik tapersersugaqarneq ajorput, saamerliunialli aamma peqqarniitsumik politikkikkut isumartik takutinniartarpaat, tamarmillu qanoq isumaqarnertik isertuunniarneq ajorpaat, akerlianilli arsaattoqartillugu nittarsaanniartuartarpaat. 60-ikkunni 70-ikkunnilu politikkikkut Italiami ineriartortoqaleruttornerani isiginnaartut peqatigiiffiliortalerlutik ilaatigut arsaanneq pinnagu politikkikkulli oqariartuutiginiakkat pinerullugit arsaattunik isiginnaariarrattalerput, maannakkullu tamanna ersarittupilussuulluni, Morten Bejder oqarpoq.
