Arsaattunik isiginnaarsinnaanertik nuannaraat
Suliffeqarfimmi InuPlanimi sulisut arsaattunik malinnaasunut ilaapput.
Nunarsuarmi pissartanngorniulluni arsaannerup malinnaaviginissaa ingeniørinngorniarluni ilinniartup Ilannguaq Lennert Olsenip suliaanut akornutaanngilaq.
- Akornutaanngilaq, nammineq aalajangikannersinnaagatsigu qaqugukkut sulisassanerluta, taamaammat arsaattut takoreerukkit sivisulaamik sulinissara naatsorsuutigaara, Ilannguaq Lennert Olsen oqarpoq.
Aamma Kalaallit Nunaata Naatsorsueqqissaartarfiani sulisut piumasut danskit Hollandimiunut unamminerannut malinnaapput.
- Siornatigulli inerteqqutigineq ajorparput, kisianni aalajangersimasunik suliassaqaraangatta soorunami siulliunneqartarput, allaffimmi pisortaq Lars Geraae oqarpoq.
Kalaallit Nunaata Naatsorsueqqissaartafiani sulisut 15-iupput.
Danmark Hollandilu ullaap tungaani unammimmata Holland marloraarluni ajugaavoq Danmark susaartoq.