Arsaattunik akornusiisoq akiligassinneqarpoq

Tamanna angutip qallunaap taamaaliortup "fodboldtosse"-mik taagorneqartup uppernarsarsinnaavaa.
Angut taanna 33-nik ukiulik 2007-imi aalakooqaluni Danmarkip Sverigellu Parkenimi arsaallutik unamminerannik unitsitsisoq, eqqartuussiviup Østre Landsretip ullumi pineqaatissippaa.

Angut taanna 1,9 millionit koruuningajannik DBU-mut taarsiisussanngorlugu eqqartuunneqarpoq.
Københavnimi Eqqartuussiviup siusinnerusukkut 900.000 koruuninik akiliisussanngortikkaluarpaa.
Maannali tassa amerlanerusunik akiliisussanngortitaavoq.

Nuna tamakkerlugu eqqartuussivimmi tassani eqqartuussisut isumaqarput, aningaasat taarsiissutigineqartussat ikilineqarnissaat pissutissaqanngitsoq.

Danmarki Sverigelu Parkenimi unammitillugit angut arpaannaq arsaaffimmut iserpoq, tamatumalu kinguneranik arsaanneq unitsiinnarneqarluni.

Tamatuma kingorna DBU 281.000 koruuninik akiliisussanngorlugu UEFA-mit pillarneqarpoq.
Tamatuma malitsigisaanik Danmarkip Sverigellu unamminissaata tulliup Aarhusimut nuunneqarnera DBU-mut 1,6 millionit koruuninik aningaasartuutaavoq.

Angut 33-nik ukiulik taanna siusinnerusukkut oqarpoq, taama amerlatigisunik akiliisussanngortitaaguni inigisaminut akiliisinnaajunnaassalluni. Akiligassaminillu tamanik akiliisinnaajunnaassalluni nalilinnillu pigisaarutissalluni.

Angut arsaattarfimmut avalakkaluareersorlu politiinit tigusarineqarpoq.
Angut akiliisussanngortitaanermi saniatigut ulluni 20-ni parnaarussassanngortitaavoq.