Arsaattoqarnerani qummortoortartorneq inerteqqutaalersinnaavoq

Isikkamik arsaalluni angutit pissartanngorniuneranni ippassaq Nuup arsaattarfiani ingerlanneqartumi qummooroortartortoqarnerani arnaq niaqqumigut eqqortippoq, napparsimavimmulluni ingerlanneqartariaqarsimalluni. Politiit oqarnerat malillugu arnaq qummoroortartumik eqqortittoq annertuumik ajoqusersimanngilaq.

Nunatsinni arsaattartut kattuffianni GBU-mi siulittaasoq Lars Lundblad pisoq pillugu aalassatsinneqarpoq.

Arsaannerup immikkoortuata aappaata ingerlanneqarnerani arsaannermi aaqqissuussisut piumaffigaakka, højtaler-it atorlugit oqaluttarfikkut isiginnaartut oqarfigeqqullugit qummoroortartunik aallartitsinerit unitseqqullugit, tamannali iluaqutaasimanngilaq, isiginnaartut qummoroortartunik aallarartitsinertik unitsinngilaat. Arsaannerullu immikkoortuta aappaata qiteqqusimalernerani qummoroortartoq sakkortooq ulorianartorlu aallartinneqarpoq.

Lars Lundblad-ip erseqqissarpaa, arsaattoqarnerata nalaani qummoroortartunik aallartitsisarneq arsaattartut kaffiata GBU-p akuerisinnaanngimmagu, arnallu qummoroortartumik ajoquserneqarnera ajuusaarutigalugu.

Siunissami taamatut ajoqusernerit pinaveersaartinneqarnissaat qanoq anguneqarsinnanersoq pillugu GBU paasiniaavoq, taamatut ittunik pisoqartillugu aaqqissuussisut klub-illu qanoq iliorsinnaanerat anguniarlugu.

Lars Lundblad isumaqarpoq, siunissami isikkamik arsaattoqartillugu qumoroortartunik aallartitsisarnerit inerteqqutigineqalersinnaasut.

Qummoroortartoq isiginnaartut ilaannit aallartinneqarsimavoq, politiillu kina qummoroortartumik aallartitsisimanersoq ilisimavaat, ualimulli politiit qummoortartumik aallartitsisoq suneqassanersoq aalajangiiffigisimanngilaat.

Nuummi politiit ilanngullugu oqaluttuaraat, ippassaq isikkamik arsaalluni pissartanngorniunnerit naammassineqarneranut atatillugu inuit nalliuttorsiuukkaluartut unnuk unnuarlu eqqissisimasumik ingerlasimasoq.