Arsaattartut kattuffiat apriilimi ataatsimeersuassaaq
Tamanna GBU-p siulittaasuata Lars Lundbladip Radioaviisimut oqaatigaa.
GBU-mi sinniisut 2008-mili ataatsimiinnikuunngillat, maannalu GBU-mi ilaasortat Timersortartullu kattuffiata ataatsimiititsisariaqalersoraat.
GBU-p siorna ataatsimiititsinngitsoorneranut pissutaasut, siulittaasullu Lars Lundbladip isumaa naapertorlugu GIF-imik assortuunnermut pissutaasut aningaasanut tunngasut pillugit GBU timersortartut kattuffiata eqqartuussissuserisua aqqutigalugu ullumi ilaasortaminut nassuiaateqarpoq.
- Klubbit kissaatigisaat ataqqillugit maannakkut apriilimi ataatsimiigiaqqusivugut, sapaatip akunnerata tulliani ulluleereerutta klubbit nalunaarfigineqarumaarput, Lars Lundblad Radioaviisimut oqarpoq.
Taanna aamma oqarpoq GBU-p GIF-imit avissaarnissaanik isumartik attatiinnaritsik, taannami isumaqarami GIF tapersersuinani assigiinngitsutigut arsaattartut kattuffiannut kigaallassaataaginnartoq.
Lars Lundblad aamma isumaqarpoq GIF tapiissutigineqartunit aningaasannappallaartartoq, GBU-lu ilaasortaqarluarnermigut amerlanerusunik aningaasannannerusariaqaraluartoq.
GBU-p GIF-imit avissaarniarnera kattuffinnit arlalinnit isumaqatigineqanngilaq. Ilaatigut Atletikkertartut kattuffiani siulittaasup Kim Godtfredsenip sapaatip akunerata ingerlanerani GBU GIF-imiiginnaqqullugu qinnuigaa, taamaalilluni GIF inuusuttut meeqqallu timersortinniarlugit suliniuteqarnermigut nukittorsaaqataaniassammat.
