Arsaattarfik qulisaq Nuummi piviusunngortinniarneqarpoq

Qulisalimmik arsaattarfiliornissaq qangali kissaataavoq. Arpattartoq Kim Godtfredsen peqatigiiffimmi "Qulisaq"-mi siulittaasuuvoq. Kalaallit Nunaanni qulisamik Nuummi arsaattarfeqalernissaa peqatigiiffiup ilungersuutiginiarpaa. Sermitsiaq.ag taama allaaserinnippoq.

Tamanna Kalaallit Nunaata Fifamut ilaasortanngornissaanut aqqutaasinnaavoq.

Fifamut ilaasortanngornerup kingunerisinnaavaa, nunanut allanut unammisartut soorlu Tuluit Nunaannut, Tysklandimut Frankrigimullu unammisinnaalernissaat. Arsaattarfissarsuarli qulisaq akikitsuinnaassanngilaq. Sananissaa 83 millionit koruuninik akeqassasoq naatsorsorneqarsimavoq, kisianni aamma 3.000-ingajannik isiginnaartunut inissaqartussaassalluni.

Peqatigiiffik "Qulisaq" taamaammat aningaasaliisussarsiussaaq. Sepp Blatterillu Fifa sunnerniassagaa peqatigiiffiup neriuutigaa.

Qulisamik arsaattarfiliornissamik kissaateqarneq pillugu Naalakkersuisut aamma Kommuneqarfik Sermersooq ilisimatinneqareerput. Taakkuli aningaasaleerusussanersut suli ilisimaneqanngilaq.