Arsaattarfiit ivigaaraasallit amerlanerit nunanut allanut sungiusaasup ujartorpai
Unamminerit nunanut allanut unammisartut sungiusaasuannit Tekle Gebrelulimit malinnaavigineqarput, suullu immikkut maluginiagassaanersut aperigatsigu ima akivoq:
- Arsaattartoqatigiit pissartanngorniunnissamut piareersarluarsimasut takussallugit soorunami nuanneqaaq. Sulilluarsimapput, inuusuttorpassuillu piukkunnartut aamma takullugit nuanneqaaq, nunanut allanut unammisartut sungiusaasuat Tekle Gebrelul oqarpoq.
B-67-ip ukiuni tulleriinni sisamani pissartanngorsinnaanissaanut suut pissutaaqataasinnaanersut aamma aperaarput:
- Sungiusarluartarput, peqqisuunissarlu aamma pingaartillugu. Taassuma saniatigut aamma assigiinngitsutigut piareersartarput, B-67-ikkullu sapaatip-akunneranut marloriaannarnatik pingasoriaannarnatilluunniit, kisianni tallimariarlutik sungiusartarput. Tamanna pissutaalluni B-67 pissartanngorniunnerni angusaqarluartarput. Tassa pissartanngorniuttoqarnissaanut atatillugu piareersarluartarnissaq pingaaruteqarpoq, piffissami aalajangersimasumiinnaanngitsoq, kisianni ukioq naallugu sungiusarluartarnissaq pingaaruteqarpoq, nunanut allanut unammisartut sungiusaasuat Tekle Gebrelul oqarpoq.
Arsaattartut ataasiakkaat pissartanngorniunnerni immikkut maluginiassatut piukkunnarsinnaasut taassuma taagumanngilai. Kalaallit Nunaannili isikkamik arsaattarnerup ataatsimut isigalugu ineriartortinneqarnissaa taassuma ujartorpaa, sungiusaasut pikkorissut arsaattarfiillu ivigaaraasallit atorneqarnerusalernissaat aamma kissaatigalugu.
Nunanut allanut unammisartut Islandimeeqatigigamigit isikkamik arsaattartut præsidentiat oqaloqatigivaat, aperalugulu suut aallunneqarnersut:
- Sungiusaasussanik pikkorissaanerit arsaattarfiillu immikkut sammineqartarput. Arsaattarfiillu Nunatsinni 2015-imi atortakkavut amerlanerit ivigaaraasaqanngillat. Qasigiannguani soorlu aamma ivigaaraasaqanngilaq. Imaanngilaq Qasigiannguani pissutsit isornartorsiorikka, assersuusiuinnarpungali, kisianni arsaattartut uannut oqartarput arsaattarfiat pitsaanerusinnaagaluartoq. Taamaattoq isumaqarpunga arsaattartut pikkorissut amerliartuinnartut, pimoorussillutillu sungiusartartut amerliartuinnarlutik, nunanut allanut unammisartut sungiusaasuat Tekle Gebrelul oqarpoq.
