Arsaarinniinnarani pineqaatissiisoqartalissaaq
Nunatsinni nakorsaatinik pissassaatinik inerteqqutaasunik atuisimasut atuiniarsimasullunnit akiliisinneqarlutilluunnit arsaarneqartarnerat Inatsisartut sukateriffiginialerpaat, unioqqutsisimasut pineqaatissinneqarlutik allatulluunnit eqqartuunneqartalissapput.
Nakorsaatinik pissassaatinik inerteqqutaasunik atuisimasut atuiniarsimasullunnit akiliisinneqarlutilluunnit arsaarneqartarnerat inatsisartut naammagiunnaarpaat. Inatsisartut siunnersuutigaat inatsit sukaterneqassasoq, taamaalillutik unioqqutitsisimasut pineqaatissinneqarlutik allatulluunnit eqqartuunneqartalissallutik.
Inatsisinik sukaterinissamut isumaqataasut Nuummi timigissartarfimmi Fit & Fun-imi sungiusaasoq Carsten Sørensen ilagaat
- Timigissartarfimmi nukippassuit atorlugit angusaqarumallutik timigissartuartut eqqarsaatigalugit allat pissassaatinik atuillutik angusaqarluarneruniartarnerat pitsaasuunngilaq, taamaattumik inatsisit sukaterneqassappata isumaqatigaara Carsten Sørensen oqarpoq. Pissassaatinik atuisartunik timigissartarfimmi ataasiakkaaginnarnik naammattuuisarsimapput, assersuutigalugu nukkassartartoq ukiumi ataatsimi iseqqusaajunnaarsitaagallarsimavoq allalu soraarsitaasimalluni.
Peqqinnissaqarfimmik nakkutilliisoq Knud Brinkløv Jensen isumaqarpoq, inatsisiliornikkut nukkassaatinik inerteqqutaasunik atuinnginnissaq avammut timersortartorpalaartumik kiinnernerussasoq Peqqinnissaqarfimmi nakkutilliisoq Knud Brinkløv Jensenip nalilerpaa. Inatsisartut ullumi aappassaaneerlugu oqaluuserereerpassuk inatsisissaq Folketingimut ingerlateqqinneqassaaq.
Inatsisartunilu siullermeerlugu oqaluuserineqarmat partiit kattusseqatigiillu tamarmik akuersissutigereermassuk aappassaaneernerani taamaallaat taasissutigineqarnissaa naatsorsuutigalugu Peqqinnissamut Naalakkersuisoq Asii Chemnitz Narup ilisimatitsivoq.
