Arsaannermi inernerit piaaraluni allanngortinneqartut
Oqaluttuarisaanermi annertunerpaamik Eorupami arsaattartoqarneq assuarnartuliorfigineqarmat, inuit 200-t nunanit qulingiliuaneersut akuusimapput. Arsaattartut, sungiusaasut dommerillu akuusimapput, inuillu 15-it tigusarineqarsimapput.
Arsaannerit inerneriumaagaannik siumut isumaqatigiissuteqartarsimasutut pasineqarlutik, taamaalillutik aningaasarpassuarnik iluanaaruteqarniartarsimallutik.
- Tupaallatsinneqanngilanga, tassami arsaannermi aningaasarpassuit kaaviiaartinneqalernikuupput nunallu peqataasartut amerlisimallutik taamatullu arsaattartut nunanit pisuujuallaanngitsuneersut nutaat ilaalersimallutik, Timersornermik aallakaatitassiortartoq Steen Ankerdahl oqarpoq.
Taakkulu aningaasanik amerlasuunik iluanaaruteqarumallutik unamminernik siumut isumaqatigiissuteqartarnerit piviusunngortinnissaannut noqinneqarsinnaanngitsumik pileritsatsinneqartarnerat angisoorujussuanngorsimalluni.
Aningaasarpassuillu matumani pineqarput, suliamilu 1 million euro-t tyskit politiivisa arsaarinnissutigisimavaat.
Europami nunarsuarsuullu sinnerani unammisut aqqutigalugit peqquserlunniartartut, uppernanngingajattumik aningaasarpassuarnik peqarput, tamatumani aqunneqarsinnaanngitsunik aningaasarpassuarnik peqarnera patsisaavoq.
Aningaasarpassuillu tamakku arsaattartunik pileritsatsitsisarput, arsaattartorlu ataasiinnaagaluarluunniit pileritsatsinneqarpat tamanna naammattoq, Steen Ankerdahl oqarpoq.
Iligiit tamakkerlugit sunnerneqartariaqanngillat, ajuuttartuat pingaarneq oqarfigiinnariaavoq, ullumikkut isertitsissanngilatit, ullumikkut pikkorlioqattaarit taava 10.000 koruuninik akilissavatsigit.
Europami arsaattartut kattuffii aqqaneq-marluk ilaasut tyskit politiivisa oqaatigaat, Champions Leaguemilu arsaannerit pingasut sukumiinerusumik misissuiffigineqarput.
Europamilu timersorneq aatsaat assuarnartuliorfiunngikkaluartoq, taama qaffasitsigisumik assuarnartuliorfigineqartalernera ernumanartuusoq, Steen Ankerdahl isumaqarpoq.
