Arsaannermi GM: Pointinik annaasaqarnissaq pinaversaartariaqalerpoq
Arsaannermi GM-qarnerani pulje 1 ilimagisaareersutut naligiiffioqaaq. Holdit arlaannaataluunniit semifinalemi inissaq suli qulakkiinngilaa kikkullu anngutissanersut sisamanngornermi unnukkut aatsaat paasinarsisinnaavoq.
Naligeeqalutik ingerlaartut tassaapput klubbit GM-qartarnerani misilittagartuut Kugsak 45, B-67 aamma G-44. Kikkut semifinalemut anngutissanersut sisamanngorpat unnukkut aatsaat paasinarsissagunarpoq. Imaanngilarli ullumikkut unamminissat pingaarutaaruttut taakkumi pointinik katersinermi pingaaruteqarluinnarput.
Ullumikkut G-44 pinngitsoorani FC Malamummut ajugaasariaqarpoq semifinalemut anngunnissamut periarfissaqassaguni. Taamatuttaaq ippoq Kugsak 45 ullumi radiokkut tv-kkullu toqqaannartumik aallakaatinneqartumi Eqaluk 56-imut unammisussaq taakkuugunarpullu puljemi sakkukinnersaasut.
T-41 Aasianneersoq semifinalemut qanilleriarujussuarsinnaavoq unnugu Kâgssagssuk Maniitsumeersoq ajugaaffigisinnaagunikku. Kâgssagssuk ippassaq Nagtoralimmut unamminermi sakkortugisassaanngilaq unamminermilu tassani pujoq taallattaaneqavissorpoq tv-mi isiginnaartunut aamma ersernerlutsitsisarami.
Aaqqissuisut SAK-meersut ajorsaqqinnissaminnut akissaqanngillat semifinale anguniassagunikku. Taakku unnugu Nagtoralik Paamiuneersoq unammissavaat taakkulu ippassaq Kâgssagssummut ajorsaraluarlutik puljemi pingajuupput.
Aajuku ataasinngornermi angusat:
Kûgsak 45 - G-44 0-0
Kâgssagssuk - Nagtoralik 1-0
B-67 - FC Malamuk 4-1
K-33 - SAK 1-2
| 1. B-67 | unamminerit 2 | isertitat 4-1 | 4 point |
| 2. FC Malamuk | unamminerit 2 | isertitat 4-5 | 3 point |
| 3. G-44 | unamminerit 2 | isertitat 0-0 | 2 point |
| 4. Kugsak 45 | unammineq 1 | isertitat 0-0 | 1 point |
| 5. Eqaluk 56 | unammineq 1 | isertitat 1-3 | 0 point |
| 1. T-41 | unammineq 1 | isertitat 4-1 | 3 point |
| 2. Kâgssagssuk | unammineq 1 | isertitat 1-0 | 3 point |
| 3. Nagtoralik | unamminerit 2 | isertitat 1-1 | 3 point |
| 4. SAK | unamminerit 2 | isertitat 3-5 | 3 point |
| 5. K-33 | unamminerit 2 | isertitat 1-3 | 0 point |
Aajuku marlunngornermi unamminissat:
Nal. 13.00 Eqaluk 56 - Kugsak 45 (tv-mi radio-milu toqqaannartumik)
Nal. 15.00 G-44 - FC Malamuk (radiomi tv-milu toqqaannartumik)
Nal. 17.00 T-41 - Kâgssagssuk
Nal. 19.00 Nagtoralik - SAK
