Arsaannermi GM-mut iligiit qulit peqataassapput
![](/sites/default/files/styles/image_934x467/public/article_images/u19_web.jpg?itok=PvMHFnIf)
Arsaattartut kattuffiat GBU aalajangerpoq aasamut angutit GM-qarnissaannut iligiit peqataasut quliussasut. Klubbit qulingiluat peqataassapput taakku saniatigut U-19-ni nunanut allanut unammisartut qanittumi Danmarkimi sungiusaqatigiittut peqataassapput.
Arsaannermi angutit inersimasut pissartanngorniunnerat siornatut annertutigissaaq tassa pissartanngorniunnerit naggataarneqarneranni iligiit qulit peqataassammata. Nagdlúnguak aaqqissuisutut anngutereerpoq taakkulu saniatigut klubbit arfineq pingasut anngunniunnerit aqqusaareerunikkit peqataanissartik qulakkiissavaat. Iligiit qulingattut U-19-ni nunanut allanut unammisartut peqataassapput.
- U-19 peqataasussanngornerat FIFA-mut ilaasortanngorniarnitsinnut attuumassuteqarpoq. Taakku ilaatigut piumasaqaatigisimavaat inuusuttut piukkunnartut inerisarnerinut suliniarnissaq aammalu inuusuttut pillugit pilersaatut tigussaasoq pigineqartariaqartoq, GBUp siulittaasua Lars Lundblad oqarpoq.
Ukiorpaalunngortuni GBU FIFA-mut ilaasortanngorniarluni ilungersuuteqarpoq aammalu arsaattartut nunani tamalaani kattuffissuata FIFAp siulittaasua Sepp Blatter tikeraartorereerlugu.
FIFA aasamut nunatsinnut tikeraartitseqqinniarpoq Uummannami, Aasianni Tasiilamilu assigiinngitsunik aaqqissuisoqassammat. FIFAp angalatitaasa Danmarkimi arsaattartut kattuffissuaneersut DBU-meersut angalaqatigissavaat. Taamatut tikeraartoqarneq iluatsillugu sungiusaasunik pikkorissaasoqassaaq pilersaarutaalluni sungiusaasut 15-it pikkorissartinneqassasut.