Arsaannermi GM-mut iligiit arfineq marluk anngutereerput corona uninngatitsingaatsiareersoq

GM-mi finale naammassisoq nalunaarlugu augustip aqqarnat 2019-mi dommeri siggarmat ilisimaneqanngilaq ukiut pingasungajaat qaangiunneranni GM tulleq pissasoq. Tamatumami kingorna nunarsuarmi coronap tuniluunnera aallartippoq.

Maanna iligiit arfineq marluk GM-mut anngupput arfineq pingajuallu sorliussanersoq sapaatip akunnerata naanerani tullermi paasinarsereerpat puljenut makitsisoqarumaarpoq.

Nagdlúnguak Ilulissaneersoq GM-mik aa qqissuisutut toqqaannartumik annguppoq taakkuuppullu 2019-mi kingulliullutik pissartanngortut.

Avannaani anngunniunnermi ajugaasut UB-83 Upernavimmeersut GM-mut anngupput.

Siornatigut pissartaasareersut G-44 Qeqertarsuarmeersut aamma Kommuneq Qeqertalimmi anngunniunnermi ajugaasutut GM-ip naggataarneqarnissaanut anngupput.

8. august aallartissapput

Kommuneqarfik Sermersooq sinnerlugu peqataasussat tassaalerput B-67 aamma IT-79 Nuummeersut taakkulu tamarmik pissartaaneq misigereernikuuaat.

Tunumi immikkut anngunniuttoqarmat ATA Tasiilameersoq GM-ip naggataarneqarnissaanut ingerlaqqippoq.

Siornatigut pissartaasareersut K-33 Qaqortumeersut Kommuneq Kujallermiit annguttuupput.

Qeqqata Kommuniani anngunniunnissaq kisimi utaqqisaalersoq sapaatip akunnerata naanerani tullermi pissaaq.

GM-ip naggataarneqarnera augustip arfineq pingajuat aallartissaaq 13-ta tungaanut ingerlassalluni.

Unamminerit 16-it KNR-TV-mi toqqaannartumik aallakaatinneqassapput.