Arsaannerit ullumi nanginneqarput
Ullumi siulliullutik unammisuupput SAK Sisimiuneersut aamma Kugsak-45 Qasigiannguaneersut. SAK tassani ajugaaq 1-0-imik.
Tulliupput K-33 Qaqortumeersut Eqaluk-54-imut Tasiusameersunut akiuulluataaqisunut 4-3-mik ajugaasut.
Unammisut pingasui siorna pissartanngortut N-48 Ilulissaneersut FC Malamuk-mut Uummannameersunut unamminerat suli ingerlavoq nikinnermili N-48 ataatsimik ajuullutik siuaqqapput. Qallunaatut radioaviseqarnitsinni qanoq inerneqarnerat tusarsinnaajumaarparsi.
Ullumi kingulliullutik arsaatissapput tassuugu nalunaaqutaq arfineq-marlunut B-67 Nuummeersut Eqaluk 56-imut Ikerasak-meersunut unammisussat.
Aqagulu arfininngornermi kingulliit - unamminerit pissartanngorniutivinnernut sapaammi ataasinngornermilu ikaarsaannginnermi – ingerlanneqassapput.