Arsaanneq: Finlandimut unamminermi Asiip qallunaat siuartitseqataaffigai
EM-mut anngunniunnermi gruppemi unamminermi kingullermi Asii Kleist Berthelsen aamma qallunaat U-19-ni nunanut allanut unammisartut Finland marlunngornermi ajugaaffigaat.
Mumereernermi Asii Kleist Berthelsen iserpoq erngiinnarlu målinut qaninngooqattaalerluni. Aamma tunniussaa isertitsissutigalugu Danmark 2-1-mut siuarpoq muminnermi 0-1-mik kinguaqqareerlutik.
Unammineq aamma taamatut naammassivoq naak unamminerup naammassilernerani Finland naligiilersitsiniarluni tamaviaaraluartoq.
Upernaaru Danmark EM-mut anngunniuteqqissaq gruppemilu ajugaanermik kingorna inissisimallualerluni.
Arnat U-19-it EM-mut anngunniunneranni anngunniuteriaaseq nutaa ukiaq manna atulerpoq. Tassani Danmark appasinnerusunut unamminissaminut periarfissaqalerpoq A-gruppemik taaneqartartumi anngunniunnerup ingerlaqqinnissaani. Dansk Boldspilunion DBU KNR-mut taamatut ilisimatitsivoq.
Upernaaru A-gruppemi ajugaasut toqqaannartumik EM-mut anngutissapput tullersortaasunilu angusarissaarnerpaat annguteqataassallutik.
Danmark anngutissappat Asii Kleist Berthelsen kalaallini siullersaalluni arsaannermi EM-ip naggataarneqarnerani arsaateqataassaaq.