Arsaanneq: FC Nordsjællandip tusaamasat kalaallinut unamminermi sipaarniarpai
Right to dream parkimi kalaallit arsaannermi nunanut allanut unammisartut unamminerisa annersaasa ilaat pissaaq.
Sinnattugarlumi sukasaatigalugu arsaannermi nunanut allanut unammisartut anguniagaqarput nuna tamakkerlugu sungiusaasoq Morten Rutkjær siuttoralugu ornitaminnik.
- Neriuppugut, sinnattugaqarpugut anguniagaqarlutalu ukiut arlaqanngitsut qaangiuppata VM-mut anngunniuttalerusulluta. Arsaannermi suliniut pissanganartoq aallartippoq mannalu ukioq siulliuvoq kalaallit nunanut allanut unammisartui 2016-miit 2020-mut uninnganikuummata, Morten Rutkjær oqarpoq.
AAMMA ATUARUK Aajuku nunanut allanut unammisartussat
Superligami unammisartut FC Nordsjælland kalaallit nunanut allanut unammisartut maanna sungiusarnerat naggaserlugu unamminissamut akuersipput.
AAMMA ATUARUK Arsaannermi silami pissartanngorniunnissat taamaatinneqartut
FC Nordsjælland Superligami sisamaattut maanna inissisimapput. Taamaattumik arsaannermi ikkatigisaarujussuarnissaq arlerinarsinnaagaluarpoq unammisassaanni arsaattut ukioq 2020 aamma 2021 pissartanngorniullutik unamminikuunngimmata.
Misigisaq nuannersoq
Taamaattorli FC Nordsjællandip tusaamasat ikinngutigiittut unamminermini atussanngilai unammineq marlunngorneq septemberip 14-at nalunaaqutaq 14.30 aallartippat.
- Unamminerni peqataavallaarnikuunngitsut atussavagut. Arsaattut ilaat tassaajumaarput Superligami paarlatsissamaatit, U-19-ni paarlatsissamaatit kiisalu U-17-ni unammisartut. Unammisartut qanorpiaq akuleriissarneqassanersut unammineq qanillippat sapaatip akunneratalu naanerani unamminermi ilungersorsimassusaat takoreerutsigu aalajangerumaarpugut, FC Nordsjællandimi sungiusaasuuneq Flemming Pedersen arlaleriarluni Nunatsinneereersoq oqarpoq.
Taanna aamma neriuppoq ikinngutigiittut unammineq iligiinnut tamaginnut kiisalu isiginnaartunut nuannersumik misigisaajumaartoq.
- Neriuutiginerpaavara naligiissumik unammissalluta arsaannermi peqataasut tamarmik pissarsiaqarluarniassammata. Aamma soorunami neriuutigaara kalaallit unammisartui unamminerup kingorna oqarsinnaassasut pissarsiarerusutatik pissarsiaralugit, Flemming Pedersen oqarpoq.
AAMMA ATUARUK KAK arsaattartut sungiusaasuanut isumaqatigiissutertik sivitsoraat
Unammineq toqqaannartumik KNR-TV-mi FC Nordsjælland suleqatigalugu aallakaatinneqassaaq.
Isiginnaariarneq akeqanngilaq taamaattorli ississutissat akeqanngitsut billet.fcn.dk-mi aaneqaqqaarsimanissaat piumasaqaataasoq, Superligami unammisartut peqatigiiffiat nalunaarpoq.
