Arsaanneq: Arsaattut Ilulissani akiniutissapput

Illup iluani arsaannermi angutit Ilulissani pissartanngorniutilerpata unamminerit pissanganartorpassuussapput. Unamminerit martsimi sapaatip akunnerata naanerani siullermi pissapput puljenullu sisamanut ippassaq ualikkut makitsisoqarpoq.

Pulje 1-miipput QNQ Qaanaamiik, Eqaluk 54 Tasiusamiik, KT-85 Kangaamiuniik aamma B-67 1 Nuummiik

GM-imi peqataarnaartussanut QNQ-mut tamanna imaannaanngilaq tassami siorna pissartaasut aamma sølvinnattut puljeminni unammisussanngoramikkit.

Pulje 2-miipput B-67 2 Nuummiik, I-69 Ilulissaniik, FC Malamuk Uummannamiik aamma SAK Sisimiunik. Tassani ajugaassangatitanik siumut tikkuaanissaq ajornakusoorpoq imaassinnaammat unamminerit naligiiffiussaqisut.

Pulje 3-miipput Kugsak 45 Qasigiannguanii, Tasiilaq, T-41 Aasianniik aamma N-48 3 Ilulissaniik. Aamma taakku eqqoriaaffigiuminaapput teknikkigissunilli arsaattartoqarnera ilisimaneqarpoq.

Pulje 4-miipput G-44 Qeqertarsuaq, UB-83 Upernavik, N-85 Narsaq aamma N-48 1 Ilulissaniik. N-48 aamma G-44 illup iluani arsaannermi angusarissaartareerput taamaattoq N-85 aamma UB-83 tupaallatsitsisinnaalluarput.

N-48-meersoq Søren Mathiassen makitsisuuvoq ikiortigalugit N-48-p siulittaasua Lena Ravn Davidsen aamma siulittaasup tullia Jens Pele Jakobsen. I-69-miit GBU-miillu Lars Erik Gabrielsen aamma I-69-meersoq Bent Petersen nakkutilliisutut najuupput.