Arsaalluni unamminerit akunnermik ataatsimik siuarput
Nunatsinni arsaalluni pissartanngorniunnermik aaqqissuisut nalunaarutigaat pissartanngorniutivinnissamut anngunniunnerit piffissaat allanngortut.
Allattoq Aaqqissuisoqarfik
aggustip 06-at 2015 13:45
Pilersaarutaagaluarpoq marlunut sisamanullu unammisoqassasoq taakkuli allanngorput, ataatsimut pingasunullu unammisussanngorlugit.
Pissartanngorniutivinnissamut anngunniunnerit siulleq nalunaaqutaq ataatsimut aallartissaaq, tassanilu Kugsak IT-79-ilu unammissapput. Unamminerit aappaanni, pingasunut, G-44 B-67-ilu unammissapput.
Aallakaatitsinerit toqqaannartumik TV-kkut aallakaatinneqassapput, radiokkullu ataatsimut radioaviisi naappat aallakaatitsineq aallartissalluni.
