Arsaalluni pissartanngorniuttoqalerpoq
Angutit nunatsinni arsaallutik pissartanngorniunnerat Sisimiuni ingerlanneqartussaq ullumi aallartissaaq.
Søren Alaufesen, SAK-mit aaqqissueqataasoq oqarpoq, holdit unammeqataasussat tamarmik tikissimalersut.
Holdit kujataaneersut Narsameersut N-85 aamma Qaqortumeersut K-33 kingulliullutik arfininngormat unnukkut tikittuupput.
- Kilisaateeqqamut ilaallutik, Søren Alaufesen nassuiaavoq.
Holdillu peqataasussat arfineq-pingasut ima agguataarneqarput. Pulje 1: N-85 Narsaq, K-33 Qaqortoq, Malamuk Uummannaq aamma ATA Tasiilaq. Pulje 2: G-44 Qeqertarsuaq, B-67 Nuuk, N-48 Ilulissat kiisalu SAK Sisimiut.
Ullumi ataasinngornermi ulloqeqqanut ammaanersiorneqareerpat, ataatsinut arsaateqqaartuussapput G-44 Qeqertarsuarmeersoq aamma SAK Sisimiuneersoq.
Pissartanngorniutivinnerit arfininngorpat ingerlanneqassapput. Angutit arsaannermik pissartanngorniunnerat KNR-TV-kkut sisamanngorpaminngaanniit aallakaatinneqalissapput.