Arsaalluni Nunatsinni pissartanngorniunnerit ullormi siullermi naligiiffioqaat

Pissartanngorniunnermi ullormi siullermi unamminerit sisamat siulliit naligiiffioqaat - marluk naligiiginnarfiupput, marlullu ajugaaqqalaarfiullutik.

Aaqqissuisut G-44 Qeqertarsuarmeersut akeqqaminnut Qeqertarsuup Tunuaneersunut, tassa N-48-kkunnut, Ilulissaneersunut pulje 1-imi unammigamik naligiiginnarput.

Pulje 1-imi unamminerit aappaat aamma naligiiginnarfiuvoq. Tassani ATA Tasiilameersut aamma Kujataani Tasiusameersut E-54 unammigamik tamarmik marloraarput.

NÛK Nuummeersut aamma Malamuk Uummannameersut pulje 2-mi unammigamik NÛK ajugaavoq marloraarluni Malamuk ataaseraartoq.

Gruppe 2-mi unammisoqarmat aamma ajugaasoqarpoq. SAK Sisimiuneersut pingasoraarput Kangaatsiameersut K-84 ataaseraartut, unammineq taanna unnukkut kingusissukkut pivoq.

Kalaallit Nunaanni Arsaattartut Kattuffianni siulittaasup, Lars Lundbladip, aaqqissuisut aaqqissuussilluarnerannik nersualaarpai.

- Avatangiisit kusanaqaat. Qaqqarsuarnut isikkivigeqaagut, arsaattarfik iluaqaaq sunalu tamarmi ajunngilluinnartumik ingerlavoq, Lars Lundblad oqarpoq.

Ullumikkut sisamariarluni aamma unammisoqassaaq.