Tamatumali nalliutinnginnerani Qasigiannguani Timersoqatigiiffimmi siulittaasoq, Kristian Rosing, GBU-mut ammasunik allagaqarpoq, anngunniutivinnerit Kalaallit Nunaata Qeqqanut nuunneqarnissaanik kaammattuilluni.
-Decembarimili paasitinneqarpugut arsaannerup naggataarnersiorneqarnera,
tassa sapaatip-akunnerini 34-35-mi, Qaqortumi ingerlanneqarnissaa aalajangiunneqartoq. Tamannalu avannaani najugaqartunut umiarsuarmik angalasariaqartunut akisussaqaaq, Kristian Rosing allappoq, nangipporlu:
- Taamaattumik naggataarnersiornissap Kalaallit Nunaata Qeqqanut nuutinneqarnissaa kajumissaarutigaarput, Kugsak-45-mi siulittaasoq, Kristian Rosing, oqarpoq.
Taannattaaq erseqqissaavoq unamminissamut aaqqissuussisartut siulersuisuisa qinnutigisimagaluaraat arsaannerit Kalaallit Nunaata Qeqqani ingerlanneqassasut, angallannerup akisunera pissutigalugu.
- Naggataarnersiornissaq ajunngitsumik ingerlavoq, ajornartorsiulli unaavoq angalanerup akisunerujussua. Uummannamit Qaqortuliarnissatsinnut timmisartumik attartornissarput 500.000 koruunit pallillugit akeqassaaq, aningaasalli tamakkernissaat sulissutigaarput, neriuutigaarpullu iluatsikkumaartoq, unamminissamik aaqqissuussisartut siulittaasuat, Gert Fleischer, oqarpoq.