Arsaalluni GM-erneq pissanngatigineqaqaaq
Pissartanngorniunnernik aaqqissueqataasut G-44, Qeqertarsuarmeersut, ATA-mut Tasiilameersumut gruppe 1-imi unammigamik, qeqertarsuarmioqatiminnit nuannarineqaqalutik sisamaraarlutik ajugaapput, ATA-rmiut illaagutitaartut.
Unamminerup aappaani assorsuaq tupaallatsitsisoqarpoq. Kujataani Tasiusameersut, E-54, Ilulissaneersunut, Nagdlúnguaq 48-mut ajugaapput, E-54 marloraartut N- 48-rmiut illaagutitaartut. N-48-rmiut pissartanngorniunnerni ingerlalluartartorujussuugaluarput.
Gruppikkaarluni ullumi unamminissat sioqqullugit gruppe 1-imi G-44, Qeqertarsuarmeersut, aamma Tasiusameersut E-54 siuaqqallutik tamarmik sisamanik pointeqarput, N-48 Ilulissaneersut aamma Tasiilameersut ATA tamarmik ataasiinnarmik pointeqartut.
Sallersaasut marluk ullumi naapissapput - unamminermilu naligiiginnassaluarunik semifinalimut marluullutik ingerlaqqissapput.
Ippassaq unamminerit inernerisa kingorna gruppe 2-mi qanoq angusaqartoqassanersoq assorsuaq pissanngatigineqarpoq.
NÛK Nuummeersoq KB-84-imut Kangaatsiameersunut ataaseraarluni siullermik ajorsarpoq, KB-84-ermiut marloraartut - taava Malamuk Uummannameersut SAK-mut Sisimiuneersunut ajugaapput, Malamuk ataaseraartoq SAK illaagutitaarmat.
Gruppe 2-mi holdit sisamat taamaalillutik tamarmik marlunnik pointeqarput, tassa gruppikkaarluni unnugu naggammik unamminissat sioqqullugit. SAK-meersulli isertitaqarnerulaaramik gruppimi siuarsimanerupput.