Arsaaffimmi angallatit
Timersoqatigiiffik I-69 ukiup aappassaa Ilulissani inuussutissarsiortut nuisitsinerannik aaqqissuisuuvoq, aaqqissuussinerillu arsaaffimmi kulturillu illorsuani Sermermiuni ingerlanneqassapput. Suliffeqarfiit 93-it peqataarusunnersut aperineqarsimapput. Aqqanillit taamaallat peqataaniarlutik nalunaarput nuisitsinermi arfininngorneq maajip 28-at aamma sapaat 29-at ingerlanneqartussami.
- Soorunami pakatsinarpoq peqataasut taama ikitsigimmata tusartarniarlutigu suliffeqarfiit suliassinneqarusuttut, aaqqissuisuniit Malik Eriksen KNRimut oqarpoq.
- Taamaattorli nuannaajallannarpoq peqataasut siorna arfiniliusinnarlutik maanna aqqanilinnut amerleriarmata. Taava anguniartariaqassavarput peqataasut aappaagu 20-unissaat, oqarpoq.
Arsaaffimmi tupersuit arlallit napparneqassapput saqqummersitsiviusinnaasut. Siornalu angallataarniat arsaaffimi angallatinik saqqummersitsipput. Maanna aamma periarfissaalerpoq Sermermiuni saqqummersitsinissaq.
- Assigiinngitsuni aamma pisoqarumaarpoq. Soorlu meeqqat trampolin-ertinneqassapput aammalu eqquiniaarusuttunut tombolartoqarumaarluni, Malik Eriksen taama oqarpoq.
Taassuma ilanngullugu oqaatigaa nuisitsinermut peqataaniartut suli nalunaarsinnaasut.