Arraa - inuiattut erinarsuut alla appippaat

Kalaallit Nunaanni assammik arsartartut kattuffiat naapertorlugu Panamerikami unammersuarnerit aallartinnerat paatsiveqarpallaarsimanngilaq.

Venezuela piffissaq kingulleq atorlugu peqataaniarunnaarluni nalunaarpoq, tamatumalu kingunerisaanik unamminissat pilersaarusiorneqarnerat allanngortinneqartariaqarpoq Nunattalu Argentinamut unamminissaa sioqqutilaarlugu Chile Mexicolu unammisussanngortinneqarlutik.

Siallerujussuarneralu timersortarfissuullu qaliarsuata ussiinnera pissutigalugu, Chilep Mexicollu unamminerat arlaleriarlugu unitsikkallarneqartariaqarsimavoq, taamaammat Nunatta Argentinallu unamminissaat nalunaaquttap-akunneranik ataasingajammik kinguaattooqqalluni aallartippoq.

Siallerujussuarneratigut timersortarfissuup nipilersuutai aamma atorneqarsinnaajunnaarsimapput, taamaammat Chile Mexicolu unammilermata inuiattut erinarsuutit appinneqanngitsoorput, nunattalu unammisartui unammileramik tupaallatsinneqarput inuiattummi erinarsuut appinneqartoq tassaavoq 'Der er et yndigt land'.

Danskit inuiattut erinarsuutaat appikkaluaannaq unitsinneqarpoq. Aaqqissuisulli 'Nunarput utoqqarsuanngoravit' nassaarisinnaasimanngilaat, taamaammallu inuiattut erinarsuuterput appinneqanngitsuuinnarluni. Danmark Panamerikami unammersuarnermut peqataanngilaq, kalaallilu inuiattut erinarsuutaat kukkusoq aaqqissuisunut tunniunneqarsimanerarneqarpoq.

Kukkusoqarnera aaqqissuisuinit kingorna ajuusaarutigineqartoq Kalaallit Nunaanni assammik arsartartut kattuffianit oqaatigineqarpoq.