Assersuutigalugu Paamiuni arpaqataapput 216-t, illoqarfimmiut qulerarterutaat taavalu Nuussuarmi nunaqarfimmiut 85-t arpaqataapput, Nuussuarmilu 200 missarpiaat najugaqarmata arpatsitsineq tassani aamma iluatsitsilluarfiusoq oqaatigisariaqarpoq.
”Hele Grønland Løber” maannamut 1.226-nit ilaaffigineqarpoq. Aaqqissueqataasut ilaata Kim Godtfredsenip, Atuarfimmi Timersornermeersup immikkut nuannaarutiginerarpaa nunaqarfimmiut amerlalluinnartut peqataarusussuseqarsimanerat.
-Arpatsitsinerup pingaassusaa allisarpaat uppernarsillugulu nunaqarfimmiut ataatsimoorfigisinnaasaannik aaqqissuussisarneq amigaatigineqartoq, taama oqarpoq Kim Godtfredsen, aappaagu arpatsitseqqinnissamut qilanaalereersoq.