Arpaffissaq tannaarpaat

Apuuteqqaartoq tassaavoq Morten Jespersen - aqqutaanilu taanna eqqumiigisaqarsimavoq.

Paaseriataarpaami kilometeri kingulleq ataaseq arpakkami piffissaq sivisunerusoq atorsimallugu.

- Kilometeri ataaseq arpakkaangakku minutsit sisamat arpassimallunga naluneq ajorpara, taavali paasileriataarpara minutsit arfineq-pingasut atorlugit, Morten Jespersen oqarpoq.

Aqqutip takissusaa uuttortarneqarmat arlaatigut kukkusoqarsimavoq, Arpattartut Ikinngutaanni siulittaasoq, Jens Vedersø Larsen, arpannermik aaqqissuisunut ilaasoq, oqarpoq.

- Danmarkimi Arpattartut Kattuffianniit takkuttoqarniarpoq, aqqullu uuttortaqqissallugu, taava akuersissummik tunissavaatigut. Sunarpiaq kukkuneqarsimanersoq nalunarput, kisianni kukkuneruvoq, tamannalu ilaatigut pisinnaasarpoq. Kinaluunniimmi kukkusinnaavoq, Jens Vedersø Larsen oqarpoq.

Arpannermi marloriarluni halv-marathonertoqarpoq. Kisianni tassa arpaffissaq kilometerimik ataatsimik takivallaarsimavoq, marloriarlutillu arpariaramik kilometerinik marlunnik tassa takivallaalerluni.