Arne Villumsen: Issittumi ingeniøringorniarfik siunissaqarluarpoq
- Issittumi ingeniørinngorniarfimmi pissutsit isumannanngillat, tamanna qularutiginngilluinnarpara, professori Arne Villumsen oqarpoq, nangilunilu:
- Issittumi ingeniørinngorniarfik nersorneqarluarpoq, Kalaallit Nunaanni akuersaarneqarpoq, soorlu aamma Danmarks Tekniske Universitetip ataani inissisimanera akuersaarneqarluartoq. Nalunaarutitigut aamma tamanna takuneqarsinnaavoq. Taamaammat kinguaariit nikinnerannut atatillugu ernummassuteqarnissamut pissutissaqanngilaq, Arne Villumsen oqarpoq.
Kinguaariit paarlaannissaat pisariaqartoq, Arne Villumsenip, aasaru 67-iliisussap, ukiut marluk matuma siornatigut nammineq kissaatigaa.
Arne Villumsenip kinguaariit nikinnissaannut atatillugu tunuarnissaa siunniunneqartoq, issittumi ingeniørinngorniat siuttuisa oqaatigaat, pissutsilli qanoq innersut itinerusumik iserfigerusunngikkaluarai, kinguaariit nikinnerannut atatillugu ARTEK-imik aqutsisuusimasinnaanissani kissaatigigaluarpaa:
- Center for Arktisk Teknologip aqutsisussaata suliamut iserluarnerunissaanut atatillugu aqutsisooqataasimasinnaanissara kissaatiginaraluaqaaq. Maannakkut pissutsit imaapput taamaattussaananga, taamaattoq neriulluarpunga, aqutsisunngortussap suliamut iserluarnissaa pillugu ukiup massuma ingerlanerani ikiuuteqataasinnaalernissara neriutigigakku, ARTEK-imik maannamut aqutsisuusimasoq, professori Arne Villumsen Radioaviisimut oqarpoq.
