Arnat utoqqaat inuusartalerput

Inuusat pissusilersortartut Japanimi arnat kisermaat assut nuannarilersimavaat. Pinngussanik sanaartortartut meeqqanut pinngualiorneq siornatigut annermik isertitsigisarsimasaat, meeqqat inunngortartut inuttussutsimut naleqqiullugu ikiliartuinnarnerat pillugu allanngorpoq. Taarsiulluni arnat utoqqaat kisermaat robotinik inuusaliuunneqartalersut, aviisi BBC allaaserisaqarpoq.

Inuusat piviusorpalaalluinnartut tikkortunik nujallit, iserujussuallit aappalaaruartumillu kiuuleerallit pisiarissallugit Japanimiut arnat utoqqartaasa kisermaat nuannarilivissimavaat. Arnaq angerlamut iserpat, inuusaq tikilluaqqusisarpoq, inequssuunneqaraangamilu arni qanoq asatigalugu oqarfigisarlugu.

Inuusaq ima piviusorpalaartigaaq, arnamut utoqqarmut allaat ernutaqqiuteeqqamulluunniit assersuunneqarsinnaasarluni.

Japanimi pinngualiorfissuit inuusat soqutigineqarnerisa kingunerisaanik meeqqanuinnaq pinngualiortarunnaarlutik pinngussanik 60-it sinnerlugit ukiulinnut naleqquttumik sanaartortalernissaq siunniukkaat, aviisi allappoq.

Spil-it utoqqaat eqqarsariallaqqissuujuarnissaannut iluaqutaasussat aamma assut sanaartugaalersimapput.