Arnat Ulluat Taseralimmi
Ukiut arlalinngorput Taseralimmi Arnat Ulluata aaqqissuunneqartarnera. Tamanna pisarpoq Arnat Ulluat Kommitte suleqatigalugu. Kommittemi ilaasortaapput Karla Hendriksen, Evelyn Frederiksen kiisalu Johanne I. Lennert Arnat Peqatigiit sinnerlugu(Anita Høegh ilaasortaanerminit tunuarnikuuvoq umimmaat qiviuinik katersinermik ulapputeqarnini pissutigalugu. Pisiniarfik Qiviut piginnittuuffigaa). Arnat Ulluanni kommitte nutaamik taarserneqartartussatut aalajangiunneqarsimavoq, aammali peqataaginnarusuttut peqataaqqinnissaminnut periarfissaqarput.
Arnat Ulluanissaaq ARNATUK – tassa Sisimiuni arnamik nersornaasiineq, nersornaaserneqassaaq. Kinaluunniit innersuunneqarsinnaavoq. Nalilersuinermi immikkut piumasaqartoqanngilaq allakkalli innersuutinik imaqartut najoqqutaralugit aalajangerneqassalluni kina toqqarneqassanersoq. Siorna nersornaaserneqarpoq Belha Ferdinansen, ilisaritinneranilu ilaatigut oqaatsit uku oqaatigineqarput: ” Taanna toqqarparput, inuiaqatigiit ilutsinni arnarpassuit ersinngitsumik inuiaqatigiinnik napatitsisut sinnerlugit.Arnaq ulluinnarni tusarsaasuunngilaq. Paasiniaanitsinnilu uku oqaatsit utertuarput: Arnaq ajunngitsoq, naammagittartoq, asannittoq, uiminik paaqqutarinnilluartoq, maalaartuunngitsoq, qiimasoq, nuannaartoq.”
Unnuup ingerlanissaa aliikkutassianik oqalugiarnernillu imaqassaaq. Aallaqqaasiutigineqassaaq arnaq nammineq aalajangigarinngisaminik pikitinnikoq – MAKE OVER-ertinnikoq. Tassani suleqatigineqarput aningaasaliillutillu: TORRAK Fashion, Glibstrup Hår kiisalu Camilla Jensen kosmetologi aammalu pisiniarfik Paarnaq-mik piginnittoq/aqutsisoq (Matas-inik tarngutinillu tuniniaasoq). Tuluit TV-kut takutinneqartartut, Trinny & Susannah perullugit arnaq pikineqartoq tarrarsussanngivippoq aatsaallu nerersuarnermi ilisaritinneqaruni imminut takussalluni.
Kalaallisuuliornermik ilinniarfiup pisortaa Kirstine Berthelsen-ip ilinniarfiup siunertaa ingerlaneralu saqqummiutissavai aammalu ilinniartumit ilinniarfik pillugu saqqummiisoqassalluni. Tamatumani ilinniarfiup inuttut ineriartorfiunera aammalu ilinniakkat qanoq pingaaruteqartiginerat paasiniaavigineqassalluni.
Nerersuarnerup nalaani pisarneq malillugu erinarsoqattaartoqanngitsoornavianngilaq aammalu oqaaseqarusuttunut mikorfoni ammajumaarluni. Nerersuaqatigiinneq naggaserlugu Nina Kimmernarlu tusarnaartitsissapput uku nipilersortoralugit: Angunnguaq Larsen, Martin Zinck, Adam Mike Kjeldsen, Villads Sandgreen, Hans Jørgen Damgaard. Arnat taakku erinarsortartut erinageqisut nunatsinnilu tusaamaneqaqisut qilanaarineqaqaat qularnanngitsumillu arnat 150-iusut unnummi nuannisarluarumaarput (inniminniineq naammassereermat takusinnaavarput peqataasut arnaannaaniartut).
