Arnat Ulluat naapitatta isummersorfigaat

marsip 08-at 2007 09:47

Ullumikkut marsip arfineq pingajuat - Arnat ulluat. Nunarsuarmi arnat angusaqarniarlutik sorsoqatigiiffiat naalakkersuinikkut naligiisitaanikkulluunniit angusaqarusulluni ilungersorfiusartoq. Nuup illoqarfiani naapitagut aperaagut Arnat Ulluat ilisimaneraat, aammali nunatsinni naligiissitaaneq qanoq isumaqarfigineraat paasiniarlugu. Aperisarput siulleq ima akivoq:

- Arnat Ulluat.

Aperaarput nunatsinni naligiissitaanermik qanoq naliliinersoq, akivoq:

- Politikki eqqarsaatigissagaanni angutaannangajassuupput arnallu ikittunnguullutik, kisianni arnanik borgmestereqarpoq maanilu Nuummi arnamik borgmestereqarpugut.

Arnaq naapitarput ulloq manna pillugu isummersorpoq:

- Arnat Ulluat atorfissaqartittuaannarparput. Arnat suliffinni assigiinngitsuni malunnartinnissaat suli pisariaqarpoq. Siornagut uagut nalitsinni, soorlu 50-it missaanni ukiullit, isummaminnik saqqummiineq ajorput, maannakkulli inuusunnerusut isummaminnik saqqummiinerusarput tunuarsimaaratik.

Arnap aperisatta ullumikkut ulloq puigoqqaarsimagaluarpaa, eqqaalerluguli naligiissitaaneq pillugu isummersorpoq:

- Naligiissitaaneq anguneqariartorpoq, soorunalimi suli anguneqarani aammalu anguneqavittussaagunarani. Arnat ulluat atorfissaqarpoq arnat angutillu assigiinngippallaarnikuummata tassuunakkullu ersersinneqarsinnaasariaqarpoq.

Angutip ulloq manna ilisimalluarpaa:

- 8. marts tassaavoq Arnat Ulluat. Ulloq taanna eqqaamassallugu pingaaruteqarpoq, eqqaamasimagaannimi- ilimanaq- unnukkuani asaneqalaassalluni.

Naligiissitaanerput ima nalilerpaa:

- Naligiittorujussuuvugut, immaqali suliffeqarfinni arnat angutillu naligiinnerusumik atugaqartitaasinnaagaluarput, akissaatit tungaatigut, amerlanertigummi suliaq assigiimmik suliarisaratsigu.

Arnat Ulluanni arnat tamassi ulluarsiorluaritsi.