Arnat ulluat Indiami perulluliuutaavoq
Siunnersuut inatsisartuni perulluliuutaalerpoq, naalakkersuisullu siunnersuutip, matumani nunarsuarmi arnat ulluannik malunnartitsinissap, taasissutigineqarnissaanik taamaatitsiinnarnerannik kinguneqarluni.
Ilaasortat ilaasa inatsisissatut siunnersuut alittorpaat, allallu mikrofoni siulittaasup nerriviusaata eqqaaniittoq peerniarlugu, inatsisartullu isumannaallisaanikkut paarsisuisa inuit nerriviusat qaavinut qallornaveersaartippaat. Tamakkua tamarmik Overhusimi ataatsimiinnerup kipitinneqarneranik kinguneqarput. Inatsisartunilu Overhusimi ataatsimiinnerup kipitinneqarneranik kinguneqarput. Inatsisartunilu Underhusimiittut pitsaaneruallaanngillat, akerliusut akerartuutinik suaartarlutik, taakkualu ataatsimiinnerat aamma kipitinneqarluni. Perulluliornerit siornatigut Indiami pisimanngisaannartut oqaatigineqarpoq. Taarsiulluguli siunnersuut partiinit tamanit tapersersorneqartoq ukiunilu 14-ini ingerlareersimasoq pillugu ministeriunerup Manmohan Singhip partiit tamaasa aqagu ataatsimiigiaqquai. Sonja Ghandi partiimut naalakkersuisuutitaqartumut siulittaasuusoq Indiami naalakkersuinermik suliallit pissaaneqarnerpaat ilaat oqarpoq, siunnersuut pingaarutilerujussuartut isigigini akuersissutigineqarnissaalu Indiap arnartaanut tunissutaajumaartoq. Ullumili tassa akuersissuteqartoqanngilaq. Akerliusut socialistinik siuttullit isumaqarput Underhusimi naalagaaffiillu ilaanni inatsisartuni arnat pingajorarterutitut amerlassusissaat qulakkeerisuujumaartoq, tamannali ikinnerussuteqartut ilaasortaatitaqarnerannut imaannaanngitsumik sunniuteqaannarumaartoq. Tamatumani naggueqatigiit assigiinngitsut pineqarput, immikkut pisinnaatitaaffeqanngitsut kaledalittit Indiamilu muslimit 150 millioninit amerlanerusut. Tamanna pillugu socialistit partiillu mikinerit allat ilaasortaatitaqarnissartik qulakkeerumallugu ikinnerussutillit immikkut amerlassuseqarnissaat kissaatigaat, taamaattoqanngippat ajortoq allisarneqaannassasoq oqaatigalugu.
Indiami kommunini qinersisarnerni arnat pingajorarterutitut amerlatiginissaat atulersinneqareerpoq. Tamannalu arnat politikkikkut oqartussaanerannik assut annertusisitsisimalluni, Danmarkip Radioa taama ilanngutassiivoq.
