Arnat Ulluat: Arnat ajornartorsiutaasa annikinnerulersimanissaat Naalakkersuisup neriuutigaa
Naligiissitaaneq pillugu Naalakkersuisup, Nick Nielsenip, tassunga atatillugu eqqaasitsissutigaa, Inatsisartut naligiissitaaneq pillugu inatsiliaat nutaaq, Inatsisartut ukiaanerani ataatsimiinnermi akuersissutigisaat.
Nick Nielsen suli isumaqarpoq, arnat suli anguniagaqartariaqartut. Inatsilli nutaaq aqqutigalugu, neriuutigaa, arnat ajornartorsiutaat annikinnerujussuanngortut.
- Arnat angutillu ulluinnarni unammilligassaqartaqaat, pingaartumilli arnat persuttarneqartartut kinguussiuutitigullu atornerlunneqartartut akuttunngitsumik tusartarpavut. Inatsilli nutaaq, persuttaasarnernut iliuusissat nutaat suliassanullu pilersaarusiat aqqutigalugit, niviarsiaqqanut arnanullu ullut tamaasa pissusilersuutaasartut akuerineqarsinnaanngitsut, tapersersuinerput annertuserujussuarsimammat malunnartissavarput, Naligiissitaanermut Naalakkersuisoq oqarpoq.
Naligiissitaanerup arlalitsigut pingaaruteqassusia Nick Nielsenip erseqqissaatigaa.
Tamakku saniatigut Nick Nielsen aamma isumaqarpoq, nakuusertarneq allatigullu naapertuilluanngitsuliortoqartarnera kisiat akiorniassanngikkivut, aammali suiaassuseqarnermik tunngavilimmik pissusilersuiffiginnittarnerit tamatigut pitsaasuusanngitsut inuiaqatigiinni suli aatugaasut aamma akiorniassagivut.
