Arnat ulluanni Nuummi pisoqassaaq

marsip 08-at 2006 05:25

Ullumikkut marsip arfineq-pingajuat nunarsuarmi arnanut ulloritinneqartarpoq, nunatsinnilumi aamma malunnartitsisoqassaaq.

Nuummi arnat ullumi assigiinngitsunik iliuuseqarniartut nunatsinni arnarpassuarnut kammattuipput seersartumik ikitseqqullugit.

Seersartoq naligiissitaanerup ulloriaatut isigineqassasoq, Nuummi arnat iliuuseqartussat nassuiaateqarput.

Nuummi ualeru tallimat-qeqqaniit Katuap silataani katersuutsitsisoqassaaq, inuiattut erinarsuuterput atorneqassaaq, erinarsortartullu angutaannaat erinarsussapput, aamma seersartoqarlunilu oqalugiartoqassaaq.

Nuummi arnat nalliussinermik aaqqissuisut erseqqissaapput nunatsinni naligiissitaanermut inatsit arnat angutillu naligiinnerusumik inuuneqarnissaannut periarfissiilluartoq aamma nalliuttorsiutigineqassasoq.

Nunatsinni naligiissitaaneq qissimigaassagaanni arnat inuiaqatigiinni aqutsinikkut qaffasissumik inissisimanerat imaappoq: Inatsisartuni 31-iusuni arnat aqqaneq-marluupput, naalakkersuisuni arfineq pingasunik ilaasortaqartuni arnat pingasuullutik.

Kommuneqarfinni 18-ini arnanik borgmesterillit tallimaapput. Nunatta ilisimatusarfia 1989-mili aallartimmat kalaallit arnat ilisimatusarsimasut tassa kandidatingorsimasut maannamut 28-pput bachelorinngorsimasullu 61-llutik.