Arnarpassuit meeqqat qamutaannik kaassuartakkanik nassatallit arpaliutinngikkunik tuaviortorpassuit Londonimi naatsiiviliarsuarni ulluni makkunani takuneqarsinnaapput.
Tassagooq arnat meerartaarnermik kingorna isikkorisseqqikkusuttut Tuluit Nunaanni neqeroorutitsialassuarmik tunineqarsimapput.
Timersuut taanna nutaaq taaguuteqarpoq ”Powerpramming” – pram tassaavoq barnevogni – anaananngorlaallu sungiusarnerminni nuunuutinnguatik kivittaartarpaat qamutaallu kaassuartakkat arpannerminni atortarlugit.
Sungiusarneq Londonimi naatsiiviliani ingerlanneqartarpoq, nuunuaqqallugooq sukkalisaarunneqarnertik soorlu nuannaarutigiinnartaraat.
- Takorlooriarsiuk nuunuutersi angerlarlusi nerisikkiartulerissi milutsikkiartulerluguluunniit, timigissartitsisartoq Liz Stuart – 2004-mili isumassarsisuusoq – suaartarpoq. Liz Stuart taamatut timigissarnermik ingerlatitseqqikkusuttunit nunarsuarmit tamangajammit attaveqarfigineqartarpoq.
Kaassuartakkanik aneerussissutinik arpaliussisunik takussagaluarussi, eqqarsaannarisi, taama timigissartarneq immaqaana nunatsinnut anngussimasoq?