Ukiut 30-it matuma siorna arnat suliffissuarni angerlarsimaffinnilu angutinut sanilliullutik marloqiusamik nammataqarput. Tamannalu allangortinniarlugu kalaalit arnat, naligiissitaanerup eqqunneqarnissaannik sorsuutiginnittut ilaat imminnut Kilut-nik taasimasut 1979-mi Qullissani Aasiveqarnermi ima erinarsorput.
-Arnanaa kalaallit suleqatigiissa eqeersimanerulerluta inuiaqatigiit peqqisuuniarpata arnat ilagiuassavaat, siulitta arnartaat pikkorissimaqisut puigortikkumanagit, angutitatillu suleqatigiillutik ingerlajuarsimammata.
Ullumikkullu arnat isumaat allanngorsimavoq, arnat qaffasissumik atorfillit isumaqarput naligiissitaaneq pillugu sorsuutissaarussimalutik.
Martha Labansen Kanukoka-p pisortaa oqarpoq, tamannaluunniit eqqarsaatigissaarsimallugu.
-Eqqarsaatigivallaarunnaarneranut tunngaveqarpoq ullumikkut suliffeqarfinni arnat angutlillu naligiissumik inissisimagatta, Kanukoka-mi kisitsivunga arnat arfineq pingasut angutit qulingiluat, taamaalilluta ulluinnarni aamma arnanut angutinullu agguaqatigiinneq naligiittorujussuuvoq.
Katuap pisortaata kiisalu Airgreenland-ip siulersuisuni siulittaasuata Julie Pars-ip suliffimmini qaffakkiartornermini arnaanini pillugu assigiinngisitsineq misigisimanngilaa.
-Isumaqarpunga piginnaanerit tassani pingaarnerusut, una arnaalluni imaluunniit angutaalluni taakkua immikkut pingaaruteqarpallaanngillat, kisiat una atorfik qanoq immersorluartiginersoq taavalu piginnaanerit tassunga qanoq tulluartiginersut taakkuukua uanga isumaga malillugu apeqqutaasut, Julie Pars oqarpoq.