Arnat pisariaqartinneqartut imaluunniit paatsoornikkut immikkut pinninneq
Arnat angutitulli pikkoritsigipput, kisiannili taamaattussaannartut isiginninnerup aamma pissaaneqarnermi naligiinnginnerup kinguneranik, maani nunatsinni siulersuisuni arnat angutitulli amerlatigisanngillat. Taamaammat naligiinnerusoqalernissaa anguniarlugu - arnat soorlu siulersuisuni inissaqartinneqalerulernissaat aqqutissiuunneqalerpoq.
Taamaattoqarsinnaanngilaq, akerliusut oqarput. Arnaaneq angutaanerluunniit piukkunnassusermut tunngassuteqanngilaq. Piukkunnassuseq sulinikkut ilinniarsimanikkullu pilersarpoq. Kikkut siulersuisuni issiassanersut piukkunnassuseqarnikkut qanorlu piukkunnartiginikkut aalajangerneqartarpoq.
Siulersuini naligiissitaaneq aamma arnat angutillu amerlaqatigiittussaanerat - KNR-imi oqalliffik aallakaatinneqalerpat sammineqassapput.
Aarhusip Universitetiani aningaasaqarnermut ilisimatuup Nina Smithip ukiuni arlalinngortuni arnat siulersuisuni inissisimasarnerat misissuiffigisimavaa, taassumalu arnat angutillu naligiissumik siulersuisuniittarnerat apeqqutaatinngilaa.
- Nuannaartorisaqassutsimut arnallu ersarinnerulernissaannut tunngassuteqarsinnaasoq qularutissaanngilaq. Kisianni sunniutipiluisa ilagisinnaavaat, arnat piginnaaneqarpianngitsut misilittagaqarpianngitsullu - taamaalillutillu qullersaqarfimmik aqutsinissaminnik nalorsartut, ilaasortanngortalernerat kingunerisinnaavaa, ilisimatooq naliliivoq.
Arnat angutillu naligiissitaanerat pillugu inatsisartut oqaluuserisaqaqqammerput - taanna KNR-imi oqalliffimmi ullaap tungaani nalunaaqutaq qulinut sammineqassaaq, aallakaatitsivimmiissallutik Naligiissitaanermut Naalakkersuisoq Nick Nielsen aamma Demokraatit siulittaasuat Jens B. Frederiksen - kalaallisut oqallinneq naariarpat - nalunaaqutaq aqqarngup qeqqaniit qallunaatut aallakaatinneqassaaq - tassani peqataassallutik Naaja Nathanielsen aamma Jens B. Frederiksen.
Oqalliffik KNR-tv-kkut aamma aallakaatinneqarumaarpoq - kalaallisuua unnugu nalunaaqutaq arfineq-pingasunut qiteqquppat aallartissaaq, qallunaatualu nalunaaqutaq arfineq-pingasunut aallakaatinneqassalluni.