Arnat pingasut nersornaaserneqarput
Ilaatigut liberiami præsidenti, Ellen Johnson Sirleaf taassumalu nunaqqataa Leymah Gbowee naalagaaffimmi inuiaat imminnut sorsuutereernerisa kingorna Liberiamiut arnartaannik isummersortitsilersimasut aamma Tawakkul Karman Yemenimeersoq inuit pisinnaatitaaffiinik aamma inuinnaat naalakkersueqataanerannik ilungersuuteqarsimasoq nersornaatisipput.
Malinnaasut arlippassuit isumaqarput, arnanik taakkuninnga pingasuusunik toqqaaneq, Nunarsuarmi tamarmi arnat angutillu naligiissitaanerannut pingaaruteqarsinnaasoq.
Akissarsiarsallumi pingasunut agguarneqarami taamaattussaannartulluunniit isigineqarsinnaavoq. Tassami arnat pisinnaatitaaffii pillugit sorsuuteqarneq sumi tamani ingerlanneqarpoq. Arnanillumi taakkuninnga pingasunik toqqaanerup, arnat angutillu akornanni pissutsinut sanilliutissagaanni naligiissitaanerup aqqani suliniuteqartoqarnerata pingaaruteqassusiata erserneriinnarpaa, Charlotte Flindt-Petersen DR-imut oqarpoq.
- Naalakkersuineq pillugu sorsuuteqarnermut naalagaaffiillu naammaginartumik ingerlatinneqarnissaannut arnat inissisimanerisa pingaaruteqarnerata aamma erserneraa, taanna oqarpoq.
Aaqqiagiinngissuteqarneq pillugu ilisimasallip, Kirsten Rønnowip akissarsitinneqartoq Europami ilisarisimaneqanngitsoq Leymah Gbowee, Afrikami inuinnaat naalakkersueqataanerat pillugu ilungersuuteqarnerminut atatillugu Liberiami Ghanamilu arnanik ataatsimuulersitsisoq naapissimavaa.
- Anaanap kisimiittup 37-nik ukioqartup, Afrikamilu naalagaaffiit piitsuunersaasa ilaanneersup qanorlu ililluni arnanik 300-nik naalagaaffinni marluusuni akerliussutsimik takutitsisimanerminnik oqaluttuartup naapinnera isumassarsiffigilluarpara, Kirsten Rønnow Due oqarpoq.
Kisiannili 72-nik ukiulik Ellen Johnson Sirleaf taannaagunarpoq nunani ineriartortuni arnat pingaaruteqarnersaat. Taanna 2005-imi inuiaat aattaqaqisumik sorsuutereersullu inuinnaat naalakkersueqataanerata aqqani Afrikami arnani siullersaalluni præsidentitut qinigaavoq.
- Kisimiivilluni akissarsisinnaagaluarpoq, kisiannili arnanik marlunnik avitseqateqarnerata takutippaa, nunarsuaq tamakkerlugu arnat iliuuseqartuummata sallersaallutillu, Charlotte Flindt-Petersen Inuit pisinnaatitaaffii pillugit ilisimatusarfimmeersoq DR-imut taama oqarpoq.
