Assi: Daniela Brown / Flickr

Qulaarpaa Arnat persuttarneqartut imminnut pisuutittartut

Arnap uiminit persuttagaasartup imminut pisuutittarnera imminut assortuuttutut isikkoqarsinnaavoq. Tamannali aniguinissamik aammalu persuttaasoqaqqinnginnissaanik siunertaqarluni iliuuseqarneruvoq.

Aappariinni persuttaasoqartalerpat, arnap tamatumunnga pissutaasoq aallaqqaammut utoqqatsissutigisarpaa imaluunniit puigorniarsaralugu. Imaassinnaavoq ajutoornertut taagaa imaluunniit uini aalakoornini pissutigalugu imminut aqussinnaajunnaarsimaneraraa. Aamma uimi artornartumik peroriartorsimanera utoqqatsissutigisinnaavaa, allaallumi persuttaasariaqalersinera pissutigalugu nalligalugu.

Kanngusunnertik aporfigisarpaat

Persuttaanerilli pigaluttuinnartillugit utoqqatsissutit atorsinnaajunnaariartortarput. Persuttagaasarneq ima akulikitsigilerpoq, arnap nalinginnaasut persuttaanerillu immikkoortissinnaajunnaaqqallugit. Tamatumunnga peqatigitillugu, persuttagaasarnerminut akuersiinnarsimanini kanngugisarpaa. Arnaq inoqatiminut akuliusimajunnaartarpoq. Aamma uimi najuinnarnera pissutigalugu assuarlerneqakkajuttarpoq.

Nammineq pisuunasorisarpoq

Angut imminik persuttaasoq kisiat sammisarilersarpaa, tassungalu naleqqussariartuinnalersarluni. Angutip asasaminik persuttaasarnerminut nassuiaatigisartagai isumaqataaffigilersarpai. Angutip isaanit imminut isigilersarpoq. Taamaaliornermigullu uimi persuttaasarneranut imminut pisuutilersarpoq, angut pisuussuteqanngitsutut isumaqartarmat.

Arnap inuttut naleqanngitsutut misigisimanera sakkortusiartortarpoq. Angutillu misigisimatilersarpaa qujasariaqartoq taama ittuulluni inooqatigiumaneqarami. Tamannarpiarlu pissutigalugu arnap aapparisani persuttaasartoq qimanneq-ajulersarpaa. Aappariinneq taama ittoq qimassagaanni nukittuujusariaqarpoq.

Najoqqutarisaq: Arnat qimarnguiisa nuna tamakkerlugu kattuffiat

Arnaavit aapparisannillu persuttagaasarsimallutit? Imaluunniit angutaavit persuttaasarsimallutillu? Qanoq ingerlariaqqippit? Apersorsinnaasatsinnik ujarlerpugut. Uku saaffigineqarsinnaapput: Dorthea Johansen doj@knr.gl imaluunniit Walter Turnowsky wtu@knr.gl

Sammisaq pillugu nalunaarusiat:

Naalakkersuisuts strategi og handlingsplan mod vold 2014-1017

Når vold er hverdag – en undersøgelse af mænds vold mod kvinder i nære relationer

Isummersuutit


 

Pages