Arnat Namminersornerullutik Oqartussat suliffeqarfiutaanni siulersuisuni amerlanerusinnaagaluarput

Namminersornerullutik Oqartussat suliffeqarfiutaani siulersuisuni ilaasortaatinneqartut arnat amerlanerusinnaasut, Naligiissitaanissamut siunnersuisoqatigiit isumaqarput.

Siulersuisut amerlanerpaartaat angutaannarnik ilaasortaatitaqarput, naak inatsisartut inatsisiliaani allassimagaluartoq siulersuisuni arnat angutillu amerlaqatigiissinneqartassasut. Namminersornerullutik Oqartussat pigisaanni suliffeqarfinni, siulersuisut amerlanersaat angutaapput.

Naligiissitaanissamut siunnersuisoqatigiit siulittaasuat Agathe Fontain isumaqarpoq, siulersuisuuffinni arnat amerlanerusariaqartut, aamma arnaaneri piinnanngikkaluarlugit piukkunnartut amerlanerarpai.

- Arnaaneq piinnarlugu siulersuisunut ikkussisoqartassanngilaq, soorunami suliassanut piukkunnartoq salliutinneqartuaannassaaq, kisianni Kalaallit Nunatsinni arnat ilinniarluarsimasut ima amerlatigilernikuupput, ujarleraanni pinngitsoorani piukkunnassuseq aallaavigalugu arnanik nassaartoqarsinnaalluni.

Agathe Fontain aamma oqarpoq, arnat siulersuisuni ilaasortaasinnaasutut piukkunnartut ilinniarluarsimasullu 70-it missaanniittut.