Arnat Korea Avannarlermi tiguagaaqqareerlutik USA-mut angerlarput
Præsidentiusimasup Bill Clintonip tusagassiortut iperagaanissaannik isumaqatiginninniarnerminut nalunaaquttap akunneri 20-t atorsimavai. Inuk taama pingaaruteqartigisoq ukiorpassuit qaangiummata aatsaat Korea avannarlermiittoq Clintonip Korea avannarlermiinnera pillugu amerlasuut isumaqarput, tikeraarneralu kinguneqarluarpoq.
Bill Clinton USA sinnerlugu Korea avannarlermiingitsoq pisortatigoortumik oqaatigineqarpoq. New York Times-ip allaaserisaa malillugu tusagassiortut ilaqutaat tv-qarfimmi sulisitsisuinut ikioqqusimapput tv-qarfillu Clintonip præsidentiulluni tullersartaata Al Corep pigivaa, taava Al Core Clintonimut saaffiginnippoq, Clintonilli USA-mi maanna præsidentiusup nuliamilu nunanut allanut ministeriusup akuersiteqqaarneqarnissaat piumasarisimavaa akuersisimammatalumi Korea avannarliliarsimavoq.
Inuit niuerutaanerat pillugu Koreap avannarliup Kinallu killeqarfiata eqqaani filmiliortillutik tusagassiortut arnat tigusaapput. Sulisitaanissamillu pillagaallutik juunip qaammataani inissiisarfimmiitinneqalerput, Clintonilu taakku sinnerlugit utoqqatsermat tigusat saammaanneqartut Korea avannarlermi naalakkersuisut oqarsimaneragaapput.
Tusagassiortut marluk kisiisa pillugit Clintoni nalunaaquttap akunnerini 20-ni isumaqatiginninniarsimanavianngitsoq isumaqatigiinniutaasinnaasunulli aqqutissiuussisimasasoq Asia pillugu Nunani Avannarlerni ilisimatusarfimmi Koreamik ilisimannittoq oqarpoq.
Inuup taama pingaaruteqartigisup isumaqatiginninniartuusimanera Korea avannarlermiunut pingaaruteqarsimassaqisoq Koreamik ilisimannittoq oqarpoq nangillunilu atorfilittamik pingaaruteqaraluartumilluunniit isumaqatiginninniartoqarsimagaluarpat taama angusaqartoqarniavianngitsoq. Tassami præsidentiusimasoq Korea avannarlermiut paasinnittarnerat malillug præsidentiujuaannarpoq.
Korea avannarlermik ilisimannittoq Gaia Helgesen DR-imut taama oqarpoq. Ilanngutassiaq Aqqalu Olsvigimit kalaallisuunngortinneqarluni atuarneqarpoq.
