Arnat isikkamik arsaallutik pissartanngorniuunnerat ullumi aallartissaaq
Ukiuni kingullerni amerlanerni arsaattartoqatigiit Nûk Nuummersut aamma Ilullissanit I-69
pissartanngortiviunnernut annguttarput.
- Ukiut kingulliit arlalippassuit immaqa qulit tungaanut Nûk aamma I-69 ajugaativinnernut annguttarput siornalu I-69 pissartanngorput,
Nuummi arsaattartut klubbianni NBU-mi siulittaasup tullia Allan Eriksen nuna tamakkerlugu arnat isikkamik arsaallunik pissartanngorniunnermi aaqqissuusseqataasoq taama oqarpoq.
- Illut iluani arsaattarnerit Futsal ukiuni kingullerni ingerlanneqartarnerisigut arnani inuusuttuaqqani inersimasunilu soqutigineqarnerat annertusiarpoq aamma arsaattartoqatigiit allat peqataanerusalernissaat piffssami qanittumi malunnarsiartussaaq, Allan Eriksen oqarpoq.
Isikkamik arsaannermik soqutiginninnerit annertusisimapput
Ivigaaraasanik arsaattarfeqalerneratigut arnat inuusuttut isikkamik arsaannermik soqutiginninnerat annertunerulersimasoq Allan Eriksen ilanngullugu oqarpoq.
Nunanut allanut unammisartut amerlanerit ukiuni kingullerni I-69-mi Nûk-mi arsaattartuunnerat pissutigalugu taakkua pissanngortanngortivinnernut annguttarput.
- Nuna tamakkerlugu unamminermi pissanganassaaq arsaattartoqatigiit allat qanoq anngunnissamut periarfissaqartigilersimaneri, tassami UB-68, KB-84 aamma B-67 taakkua akuulluarsinnaanerat pissanganaqutaassaaq maannakkut B-67-mi arsaattartut nunanut allanut unamisartunut peqataasalernikuugaamik, Allan Eriksen oqarpoq.
Arnat isikkamik arsaallutik nuna tamakkerlugu pissartanngorniunnermi peqataasussat tassaapput B-67 aamma Nûk Nuummeersut, I-69 Ilulissat
UB-68 Uummannaq kiisalu KB-84 Kangaatsiaq.
Nuna tamakkerlugu arnat isikkamik arsaallutik pissartanngorniunerit KNR radiokkut toqqaannartumik aallakaatinneqartassaput.
