Arnat isikkamik arsaallunik GM-ernerat ataasinngorpat aallartissaaq
Isikkamik arsaalluni nunatsinni pissartanngorniunnermi ukiormanna Qeqertarsuarmi ingerlanneqartussami timersoqatigiiffiit tallimat peqataassapput. Disko 76 aaqqissuisuuvoq.
Allattoq Peter Troelsen, Simon Uldum
juulip 26-at 2013 05:03
Timersoqatigiiffiup aaqqissuisuusup saniatigut, timersoqatigiiffiit Nuummeersut marluk, NÛK aamma IT-79, I-69 Ilulissaneersoq FC Malamullu Uummannameersoq peqataassapput.
Pissartanngorniunnerit ataasinngorpat juulip 29-iani aallartissapput arfininngornermilu aggustip pingajuani pissartanngorniutivinnerit ingerlanneqassallutik. Unamminerit ullormut marluusassapput. Unammineq siulleq nal. 16.00 ingerlanneqariarluni aappaa nal. 18.00 ingerlanneqartassaaq. Finale bronzennanniunnerlu nal. 13.00 aamma 15.00 ingerlanneqassapput finalemillu naggaserneqassallutik.
