Arnat inuusuttut volleyball-ertartut AWG-mut ilaassanngillat
Piumasaqaat ataasiinnaavoq, issittormiut unammiuaarnissaannut peqataassagaanni. Tassalu nunatsinni Volleyball-imik pissartanngorniussimanissaq. Naallu nukappissani iligiiaat tallimat siorna pissartanngorniunnernut peqataasimagaluartut, siorna pissartanngorniuttoqarmat inuusuttuni nivissanik peqataasoqanngilaq.
- Inuusuttut arnani siorna nalunaartut ikippallaarneri pissutigalugit peqataasoqanngilaq. Tamannalu tunuliaqutsiullugu GIF aalajangerpoq, arnanik inuusuttunik nunanut allanut unammisartunik pilersitsisoqassanngitsoq, Nunatsinni volleyball-ertartut kattuffianni KVK-mi siulittaasoq Ove Thomassen oqarpoq.
Kattuffiulli siulittaasuata siunniuppaa 2014-mi issittormiut unammiuaarnissaannut inuusuttut arnat peqataanissaat anguniarneqassasoq.
Ukioq manna inuusuttut GM-qarnissat qaammammik ataatsimik siuartinniarneqarpoq oktoberi qaammat ingerlanneqartussanngorlugu. Tamatumunnga tunngaviuvoq atuartut ukiaanerani atuanngiffeqartarnerisa atorluarnissaa.
Angutit inuusuttut nunanut allanut unammisartut
Inuusuttut nunanut allanut unammisartut Maniitsumi katersuunnerat naggaserlugu issittormiut unammiuaarnissaannut unammisussat qulit toqqarneqarput.
Toqqarneqartut tassaapput:
Hans Mikaelsen
Julian Pape Kofoed
Gustav O. Egede
Jafet Kreutzmann
Ove Petersen
Angunnugaq Egede
Kim Pape
Julian Napatoq
Albrecht Larsen
Johannes Rosing
Ukioq manna issittormiut unammiuaarnerat Arctic Winter Games Canadami Yukonimi Whitehorsemiittumi martsip aappaaniit qulingata tungaanut ingerlanneqassaaq.
