Arnat inuusuttut: Suli naligiissitaavilinngilagut

Anguniagassaqarneq arnat ataasiakkaat namminneq aaqqitassarivaat, sunamita?!

-Isumaqarpunga arnat angutillu naligiilluartut, angusaqarnikooqaagut piffissaq sivikitsigisoq, kisiat isumaqarpunga suli arnat kalaallit ilai suli angerlarsimaffinni naligiissitaanngitsut.

Isumaqarpunga arnat ulloq una atorluartariaqaraat angutit oqarfigalugit uangaana ullumikkut ullora! poortukkanik tuniniannga naasullu sukkulaallu.

Eyla Holm qeqqata ilinniarnertuunngorfiani atuartoq oqarpoq.

Angerlarsimaffimi naligiinnginneq piniartukkormiutut kulturitta iluani perorsaariaatip, ullutsinni suli nipilersoqataaneranik pissuteqartoq Mattaaraq Olsen isumaqarpoq.

-Qanga perorsaariaatsit eqqaassagaanni arnat kisimiunerusoq illup iluani suliaqartarput, angutit silami, massakkumut ikioqatigiinnerit iluamik ingerlasinnaagaluarput, Mattaaraq Olsen oqarpoq.

Elisibannguaq Kreutzmannip ullutsinni angutit arnallu akornanni naligiinngittoqarnersoq takusinnaanngilaa.

-Tamarmik assigiititaanermik malunnartoqanngilaq. Naligiissitaaneq anguneqarsimarpasippoq torrappoq.

Arnat ulluat malunnartinniarlugu Post Greenland, Naja Rosing Asvidip qalipagaannik nipitittakamik, ullumi nalunaaqutaq marlunut Post Greenland-ip ataatsimiittarfiani saqqummersitsissaaq.